Jelaleddin Rumy

JELALEDDIN RUMY

Çagakan terk edip dogduk diýaryň,
Rumy gör, nirede tutupdy mesgen.
Ylaýhor leşgeriň zarbyna dözmän,
Gazabyna dözmän,
Müňlerçe Rumy
Tünegini taşlap,
Malyny taşlap,
Gaçypdyrlar,
Haşlap – haşlap.
Duşman gelýär,
Ýuwdarha deý waşşyldap.
Çingiz han diýýärler onuň adyna,
Nebir – nebir şäherler,
Nebir – nebir obalar
Tozdy,
Ylaýhoruň badyna.

Asyrlar geçensoň asyr yzyna,
Bir zat meni bu gün oýa batyrýar.
Diýýänler bar – men Çingiz han neslinden,
Birjik-de ol utanmaýar
Öz ylaýhor aslyndan.

Gana suwsan ganhor gandan doýmaýar,
Bu gün bir mes Çingiz hany “Atam!” diýip oýnaýar.
Ömür ele gylyç almadyk Rumy
Elinde döwlet galamy
Nur bolup aýlanýar JAHAN – ÄLEMI!

13.08.13.
                                                                                         ▶ Rubagylar 

Üýtgewsizdir mukaddeslik süresi;
Haýyr-sogap – ine, ömür süresi.
Neýlesin bir betnebisiň elinde – 
Ölçäp bilmez öz – özüni terezi.

* * *

Bigam gardaş gardaşyndan bizardyr,
Göwsünden süýt beren ene azardyr.
Mest bolsa-da haram-keýpi-sapadan
Barybir ol ýerde tümmek mazardyr.                                       

*  *  *

Diýipdiler bedew bolmaz gatyrdan,
Haýyr işler çykmaz diýme şatyrdan.
Bu akyly öňem telim eşdensiň
Diňle muny bu gezegem gadyrdan.

* * *

Kä aldy, kä bergi bolup ýaşadym
Kä bugra, kä ýygra bolup ýaşadym
Bir günjük düşekde ýatsa-da goňşym
Diýdi: - Ömür görgi bolup ýaşadym!..

      ▶   Şahyr  dostlaryma 

Eziz dostlar, 
Goşgy ýazyp, ylham berdiňiz maňa.
Goşgyňyzda melhem berdiňiz maňa.
Dutaryma gül heň berdiňiz maňa.

Goşgy diýmek näme – duýgudyr başda,
Duýgy-da söýgüdir başga.
Şondan başlanýandyr ojaga söýgi,
Hem-de mährem gujaga söýgi.
Il-günüňe söýgi,
Gülüňe söýgi,
Hemme zat başlanýar ajap duýgudan.
Daş boluň, dostlar,
Soňy gelmez gaýgydan.

Bir pursat göz aýladym men geçene,
Az däl eken geçilen ýol,
Ýollar bizi alyslara ýollapdyr.
Kötel ýollaň agramyna
Epmändiris dyzymyzy.
Iň esasam
Gömmändiris yzymyzy.

“Ýamanlyga ýagşylyk är kişiniň işidir”,
Gulagymda diýen sözi atamyň.
Durmuş-da bi, ýagşysy bar, şeri bar,
Görüp durka köri bar,
Eşdip durka keri bar.
Özümem  ak garga däl,
Belki-de,
Sany ýokdur hatamyň.

Dost tutundym, haýyr-sogap etdim men,
Ýagşylary ýüze togap etdim men.

Dostlar, siziň bilen duz-emek bolup,
Göz ýetirdim bir zada:
Siz meniň eziz dostlarym,
Hemem çyn dost unutmaýar
Hiç haçan eziz dostlaryn.

“Toýuma çakylyk bilen gelen dost,
Çakylyksyz gelsin ýaman günümde”.
Diýen atam bu sözüňe
Hemmeler gol goýsa gerek.
Gadymýetiň dana sözi
Hiç haçanam däldir telek.

Senden razy öňde-soňda
Çarhy pelek, çarhy pelek.
Bir ýar berdiň misli melek,
Gyz berdiň gyz ýerine,
Goşa didäm – goşa nerim
Birisiniň zary men.
Bir ganatsyz ýaly men.

Eziz dostlar,
Goý, dik bolsun başyňyz.
Uzak bolsun ýaşyňyz,
Büdremesin çapyp barýan atyňyz,
Gowşamasyn badyňyz.
Guwanyp gezsin mydam,
Size ýakyn-ýadyňyz.
Gum diýip garbanyňyz,
Içi doly hum bolsun.
Size gyýa garanyň iýejegi gam bolsun.
Birje hoş sözüňiz
Göwünlere em bolsun.
Elmydama ýanyňyzda
Başdaşyňyz hem bolsun.
Galanyn özüňiz aýdyň,
Ýene başga kim bolsun?
Ogul gyza bagt gerek,
Bagty özleri gazansyn.
Adam gadryn biler ýaly,
Goý, birneme kösensin.

Dostlar, eziz dostlar, mähriban dostlar,
Ömrüňiz zyýat.
Hiç haçan
Bolmasyn haýat.
Diňe arzyly günlere
Bolalyň şaýat.