KÖŇÜL PELSEPESI
Duýmasam durmuşyň dabarasyny,
ýerlemesem gujagynda günleriň.
Derwüş deý syrymy gizläp içimde,
gije-gündiz golda bolsa gülberim.
Sen maňa düşün.
Paýlap juwan ömrüm bolsadylara,
ham hyýallaň hasylyna garaşsam.
Görülmedik günde sessiz şäheriň,
bir näbelet köçesinde azaşsam,
didelerden, didarlardan ara açsam,
Sen maňa düşün!
Inçe billi ýodalarda usurgap,
teýim kylsam husnuň istäp çöl içre.
Seri sergin sähralarda syňsyrap,
hoş söz üçin bagtym bersem müň hijre.
Sen maňa düşün!
Dodagymdan damyp bilmän hak sözüm,
damagymda doňup galsa buz deýin
Päk niýetleň pellesinde bir pursat:
Başa çeksem, Haýýam göteren meýin.
Sen maňa düşün!
Düşün maňa!
Ýeller öpen,
Gün ogşan,
Geýimsiz daglarda ýerlese ruhum.
Dünýäň dabanynda ýyldyrym çakyp,
Badam gözýaşymdan püre-pürlense.
Gözläp gözýetimden gämisin Nuhuň,
Düýnleriň düýşünde geljegim görsem,
Bir gün ýetmek üçin seniň ýanyňa,
Her demimde, ädimimde özgersem,
...Ýol ýitiresem, ýetip bilmän menzile
Al ýanyňa, bakyp solan meňzime!
▶ DÜŞÜNMEK
Gel, gowsy geçmişden bolma:ly nadyl!
Agtarmaly geçip giden derdimiz.
Söýgä giç düşündik,
Şoň üçin bu gün
aýralykda çekip ýörüs derdi biz.
Hoşlaşykda,
Dil däl, dymdy ýürekler.
Hoşamaý günleriň bilmedik çakyn.
Biz bagtyň keşbini görmedikmi, ýa
iň eziz düýşüni gördükmi Hakyň?!
Ýazgytda ýok bagtyň naýynjarlygy,
Bizi bir-birekde galdyryp bilmez.
Iň soňky sözümiz yşgymyz aklap,
Teşne umytlarmyz gandyryp bilmez.
Günler galňap barýar ol günden bäri,
Gezip ýörüs düýnümizden kemsinip.
Gursagymda seni göterip sensiz,
Sen hakdaky ýazan,
ýazjak aýdymlam
Tukat gijeleriň hüwdüsi bolup,
Ýaňlanar ýaýlalaň ýüregne siňip.
Biz gowsy geçmişden bolmaly nadyl,
Solan umytlardan tapmarys many,
Gün geler,
gül açar ömür bossany.
Şonda oýalykda ýiten bagtymyz
Sežde edip ýörer zemin-asmany.
▶ GALAR
Hiç haýyr bermedik miwesiz bagyň,
Bahasy guransoň odunda galar.
Diňe şol hakdaky ýatlamalaryň,
Bir pursatlyk ýakan oduňda galar.
Adamdyr özüniň uly duşmany,
Ýürek islär öz ýaryna du:şmany,
Ykbalyňda aýralygyň nyşany,
Iň eziz görülýän zadyňda galar.
Durmuşda çyn dostdan duşmanyň kändir,
Haýyr işde badak atjak betpäldir,
Umytsyz başlangyç başlangyç däldir,
Ol diňe batlanan badyňda galar.
Ýürek gamdan çişer mähre ganmasa,
Göwnüň aglar her pursatda gam basa,
Gül ýüzüňden bagtyň nury dammasa,
Köýen umytlaryň dadyňda galar.
Kineler dert berer,gezmegin aýtman,
Ädim ät hoş goş güne yzyňa gaýtman,
Il üçin iş etseň gijeler ýatman,
Asyrlar geçsede adyňda galar.
Ýüregmize goýup bir pursat eli,
Mährem enelere tagzym edeli,
Zeminde ýagşy söz azam däl weli,
Ýöne iň ezizi ýadyňda galar.
▶ GÜÝZ HAKDA
Güýzüň ysy gelýär ine,
Säherleriň howasynda.
Äleme buşluk ýaňlanýar,
Serçeleriň owazynda.
Meýdandaky hatar baglar,
Geçen gije has üşäpdir.
Başlary saralan baglar,
Saçlaryn ýere düşäpdir.
Garagolja daň şemaly,
Müň öwüsip göwnün hoşlar,
Her bir adam şu pursatdan,
Höwes bilen işe başlar.
Gök asmanyň bulutlary,
Kerwen kimin düzülipdir.
Şahasyndan tänen ýaprak,
Alma kimin üzülipdir.
Düzülipdir ýene gökde,
Durnalaryň giň hatary.
Al-asmana nagyş bolup,
Bezeýärler günbatary.
Täzelenýän tebigatdan,
Aýrylma ýokdur sähelde.
Göze dolýar gözel güýzüm,
Ine şeýdip her säherde.
▶ SAŇA SÖÝGIM
Jogap tapman tolkun atan gaşlardan, Söýülmesem nädeýin.
Gözleriňden dökülmejek ýaşlardan,
Söýgi bolup ädeýin.
Gül keşbiň nurana, öwüp aýdamok,
Jadylady şol meni.
Hyýalymda seň dünýäňden gaýdamok,
Unutma ýar, gelmegi.
Ykbalyňda şowly çykanda bije,
Söýgiňi ezizlegin.
Ümsümlige siňip garaňky gije,
Ýazaryn ezizligin.
Ter güllerden bezäp sagy-sollaryň,
Gözel aýdym düzerin.
Diňe saňa ýetmek üçin ýollaryň
kynçylygna dözerin.
Dabanymda daşlar yzyn goýsa-da,
Ýedi aşyklar ýardyr.
Jellat alyp, ýa tenimden soýsa-da,
Ähtime wepam bardyr.
Mežnun kimin meňzesem-de dälä men,
Ýürekdäki aşygyň.
Yşkym üçin jenaýatçy däl-ä men,
Alçy gopan aşygyň.
Her günüme al salsa-da pelegiň,
Derdin ýolumdan itmen.
Synasaň-da,
gynsaň-da melegim,
Ynan, söýgiňden gitmen!
▶ BIRMAHAL, IKIMIZIŇ DOSTLUGYMYZ...
...Öwrülip köne haraba,
Kalbyma güman indi.
Dünýäniň degre daşyna,
Ylahydan duman indi
Erkim ýetmez ertirime,
Keç täleýe gargyşym ýok.
Sabrymyň soňky nokadyn,
Ömür-ömür goýmuşym ýok.
Diýsinler, däli diwana,
Ýüzüme diýsin diýenler.
Ýogsa, ýüregme ýapyşdy:
Düýnüki duzum iýenler.
Kalbym içinde ýat men,
Biguman düňle illerde.
Sabrymy synama dostum!
Abraýym galar dillerde.
Seniň duzuňy depmerin,
Kem etmerin dost nepinden.
Bir haýyşym: gutar meni,
Müň ýamaly il gepinden.
Barlygymy duýmaýyn men,
Uýmaýyn özgäň diline.
Senden ömre deň haýyşym:
Ýaşama şöhrat dilene!
▶ UMYT
Sensiz arzuw bilen geçip dur günler,
Gaýdyp geljegiňe berermiň kepil,
Ýalňyzlyk oduna kalbymyz örtäp
Orta ýolda galdyk bolup ser sepil.
Berse il söýgimiň çyn jogabyny,
Döz gelerin sowuklygna bar gyşyň.
Ýa seni ýürekden söýenim üçin
Çekmelimi özgeleriň gargyşyn.
Barmyşyn çyn söýgiň jebri –jepasy,
Döz gelerin talak berip derdine.
Dag daşlary ogşasa-da dabanym
Bararyn men bagtym alyp gerdene
Merdiňe bir pursat aýlap nazaryň,
Çyn söýgüsin aňla serin säm eden.
Bagtyň özi boýna salyp halkasyn
Duşurandyr ykbalyňa täzeden
Näz eden günleriň ýalňyz ýoldaşym.
Aglaýar ýüregim gussada sessiz.
Unudyp şatlygmyň gülkülerini,
Wysala ýetmedik ömrüm höwessiz.
Sensiz arzuw bilen geçse-de günler,
Geljegim bagtyňa baglydyr ýarym.
“Ýok, aýyrmak üçin duşuran däldir,
Seni maňa sataşdyran ykbalym!”
▶ URUŞ ÝATLAMASY
Watan üçin söweş guran gerçekleň,
Mertlik bilen akdy gyrmyzy gany.
Ýat ülkede topragyna zar bolup,
Näbelli mazarlañ köpeldi sany.
Ol mazarlaň hersi bir uly ykbal:
Bir öýüň eýesi, bir öýüň başy,
Ýar gujagnyň mährin duýup bilmedik
Täze gelen gelniň gerçek ýoldaşy.
Boý gyzlaryň ogurlanan arzuwy,
Gussalary ýaly gaýdyp gelenleň.
Eli degen hatyn okap begenen,
Köýen umytlary garry gelinleň.
Eneleriň ynamyna ýugrulan,
Näbelli ýorgudy atdyrlan pallaň.
Mertlik mekdebiniň nusgasy bolan,
Kakalary dogulmadyk ykballaň.
Näbelli mazarlar bir uly umyt,
Her kim ony özüniňki saýýandyr.
Minnetdar nesiller ýatlap elmydam,
Watan gahrymany diýip söýýändir.
Goja dünýäň gujagyndan ýer alyp,
Watançylyk makdebine öwrülen.
Gahrymanlar ölmeýärler aslynda
Ýatlamasy bolup geçen döwürleň.
▶ ÝAZ OÝLANMASY
Kebelekler bal şerbedin dadarlar,
Gözel gülleň badasyna ýygnanan.
Ýaşaýyşa aýan bolar gözellik
Mart aýynyň gujagynda ýygnalan.
Kalba könelmejek şatlyk bagyşlar,
Guş sesi,
Gün mähri,
gülleriň ysy.
Ykbalyňda çüwen bagtly bije deý,
Ýürege ýol salar günleň gowusy.
Ýaşaýşyň yşkyna düşen guşlaryň
buşlugynyň simfoniýasy düzüler.
Gyşda ýagan gar-ýagyşlaň haltasy-
- bulutlaryň aralary üzüler.
Ýaşyl öýme orananda gür baglar,
Pyntyjaklar owurtlaryn ýararlar.
Gülleň ysy bir-birine garyşyp,
Gözýetmez giňlige ganat ýaýarlar.
Mylaýym şemala güller üwreler,
Süýt bolar ýaz ýagşy, guş sesi hüwdi.
Asman monjugyna kemsiz ýuwunyp,
Gelin kömelekleň tapylar höwri.
Bu pasyl -
ýaşaýşyň ýalkanan çagy,
Göwünler galkynyp gökde gaýmalar,
Muhabbetiň mähremligne tebigat
nepisligiň näzikligin gaýmalar.
▶ ŞAHYR DOSTUMA
Senli günler ykbalymdan nalaman,
Dillerimde şükrüm bolar hemişe.
Bagtly günleň aýanlygna aň salyp,
Ädimlermiz deň ädiler her işe.
Dogursa-da, günler gaýgy – alada,
Ýolumyza bagtdan mahmal ýazylan.
Kalbym köne kinelerden ýadasa,
Bir sözüňe ömür gussam ýazylar.
Gözleriňde görülmedik paýhas bar,
Gerdeniňde Hakdan gelen halat bar.
Arş deňinde adyň ýazjak geljege,
Galamyňda göge galan ganat bar.
Setirleriň süňňün süzer barlygyň,
Gözelligi jana geler dag-düzüň.
Ykballaryň gül bitirjek döşüne,
Soňlanmadyk söhbetlermiz bar biziň.
Hoş niýetleň bagta gönügen ýoldur,
Çelgi bolar haýyr işde, şer işde.
Görümsiz gözlere gynama janyň,
Sogaplarňy ýazyp otyr perişde.
Alnymyzda ötülmedik ýol ýatyr,
Seniň üçin ömre deňi-duşdyryn,
Eger ýollar düşse durmuş duzagna,
Kapasada ýalňyz galan guşduryn!
