Örän aýdyñ hem çuñ bir hakykat bar...

ÖRÄN AÝDYÑ HEM ÇUÑ BIR HAKYKAT BAR...

Örän aýdyñ hem çuñ bir hakykat bar:
Diriler ölüpdir, diriler ölýä.
Ýöne şol ölenler müñ ýyllar ötüp,
Başga biri bolup inýär bu dünýä.

Beýle bolsa, kimkä meniñ geçmişim?
Şahyrmykan?
Aşykmykan?
Ýa daýhan?
Ýa ol namartmykan çyn sözden gorkýan
Hem gorkusy üçin çyn söze duşman?

Eger şahyr bolsa, meniñ şygrymy
Özüm bolup, menden gizlin okýandyr.
Ejiz şygrym üçin saçlaryn ýolup,
Menligine ajy gözýaş dökýändir.

Eger aşyk bolsa, söýmediklerme
Söýýän diýenime ýanyp-bişýändir.
Ol meniñ ruhumyñ kazysy ýaly,
Öz päkligi bilen maña duşmandyr.

Eger daýhan bolsa, toprakdan alyp,
Oña bermeýänme tutýandyr için.
Hem onuñ bir oñat dilegi bardyr
Topraga bir tohum atarym üçin.

Indi bu ýaşlygam ötüşip barýa.
Etsemim bar bolsa, boldy bir çeni.
Gije-gündiz şahyr, aşyk hem daýhan
Depämden seredip, goýmaýar meni.

Dünýede çyn sözüñ sarpasyn saklap,
Çyn söz üçin özüm ederdim gurban.
Ýazaryn, söýerin, tohum seperin,
Razy bolar
Şahyr,
Aşyk hem Daýhan.

Ölsem, dogry sözüñ şol duşmanyny ㅡ
Inkär eden ㅡ meni öper bu ýerim,
Müñ ýyl ötüp, ýene döräp, bir şahyr,
Aşyk, daýhan bolup dowam ederin.

Yzyma seretsem, bir giden umman,
Öñüme seretsem, bir giden umman,
Geçmişiñ öñünde uly bergim bar.
Geljegiñ öñünde uly bergim bar.

Gurbannazar EZIZOW