10:15 12-ä 1 minut galanda... / hekaýa | |
12-ä 1 MINUT GALANDA...
Ol ýadyma düşse, hiç kime bildirmän, aýak yz sekilmedik jelegaýlara gidip aglasym gelýär. Kanda sen, aýdyp ýetişmedik, söýgim?! Nirede bolsaňam, sen häzir lukman bolmaly. Maňa o gyz bilen bäsleşige gatnaşmak nesip edipdi. Ýekeje aýdan sözi welin şindem ýadymda: — Ýüregiňi diňle... Ol birbada söýülmäge muwapyk gyz. Bir sebäp bilen telefon belgisini tapyp, jaň etdim. Söýgim assyrynlyk bilen onuň göwün taryna kaksa, gyzyň mahmal sesi halys ýüregimi ersdirýärdi. — Alo! — Salam, bu men. Şol bäsleşikdäki oglan. — Ha, gowumysyňyz? Aýdyberiň, diňleýän. — Bäsleşigiň jemi nähili bolduka? Bilýäňizmi diýjekdim?! — Ýeňijiler yglan edilende siz ýokduňyzmy? Onuň bu sözlerine ýüzüm lap-lap ýandy. Utanyp trubkany goýdum. Men oňa soň-soňlaram tötänden duşan bolup, hal-ýagdaý soraşardym. Hatda tötänlikde-de birki ýola görüpdim. Şonda gürleşmäge zat tapman, sagat soramda, ol: — Bäsleşigiň jemini bildiňizmi? — diýip, syrlyja ýylgyryp geçip gitdi. Göwnüme bolmasa, onuňam mende göwni bar ýalydy. Edil şol wagt yzyndan ýetäge-de söýgimi aýtmagyň deregine, neçündir dilim tutulyp, damagym gurady. Ýüregim batly-batly urup, demim tutuldy. Şeýdip, oňa diýjeklerim körük deý köýüp gitdi. Ýaňadan jaň etmek üçin ýüz müň bahana agtardym. Ýöne bary ýasamady. Ýekeje ýol galypdy — diňe päk söýgimi beýan etmeli. Oňa-da çekinjeňligim asla ýol berenok. Dostlarym maňa: «Şol gyz diýip ýörşüňe, öýlenmän müjerret ötersiň. Gül ýaly gyzlar ugruňda janserek. Al, saýla-da birini» diýip kän aýdypdylar. Ýazyjy: «Çyn söýgi ýygralyga ýugrulan söýgüdir» diýmeýärmi?! Şol-a hakykat. Çyn söýgiň ezýetinem, lezzetinem çekmek meň paýyma düşen ýaly. Ara biraz wagt düşse-de, oňa ýene til kakdym. Aňyrdan diňe abonentiň telefonynyň öçürilendigini aýdýan zenanyň sesi eşidilýärdi. Näme üçin beýle bolýar? Maňa gahar edip öçüräýdimikä?! Ýüregimden agyr daş asylyp duran ýaly janyma jaý tapamok. Ony gören hemişeki ýerlerime baryp, ýatlamalar kölüne batýan. — Şu kenarda men saňa aşyk bolupdym. Göýä, sen häzir bir ýerlerden ýylgyryp çykaýjak ýaly bolup dursuň. Emma ýylgyryşyň kalbymda ýaşaýanam bolsa, häzir sen ýok. Şonda-da seniň bu dünýäde barlygyň ejirli göwnüme teselli berýär. Menem dessanlardaky aşyklar ýaly yssy mähriňe ýanyp, sowuk aýazyňa buýsadym... Aradan esli ýyl geçdi. Entegem şol ýygralygym. Aram-aram öz ýanymdan: «Ol bireýýäm durmuşa çykandyr» diýip, şeýle bir gam çekýän. Negada-da: «Ýok, beýle däldir» diýip, onuň bilen hyýalymda didarlaşýaryn. Soň ýene-de hoşlaşýan... Täze ýylda iň elýetmez arzuwlaram wysala öwrülýär diýýäler. Ýüregimde adyny göterip ýören şol näzenin gözelimiň ugruna çyksam, gury aňňalak gapdygym bolaýarmyka?! Çagalyk bir süýji müçe. Adam hernä gama batanda, şoňa ýüzlenýär. Häzir çagakam Aýazbaba arzuwlarymy ýazyp ýollanym ýadyma düşýär. Ýene şeýdäýsemmikäm?! Adamy ýaşadýan ynam dälmi, eýsem?! Meniň çagakam Aýazbaba ynanyşym ýaly, Täze ýyldaky söýgime gowuşjakdygyma-da ynanasym gelýär. Täze ýyla-da sanlyja gün galdy. Uly-kiçiň ýürekleri joşup, dileg edýän pursady golaýlap gelýär. — Aýazbaba, hakykat danam arzuwa ýetirmek senlik bolsa, ýekeje islegim — meni söýgülime gowşur! * * * Bu gün ýüregimi bire baglap, şol zybasypat aşygymyň gözlegine çykdym. Özem, gara çynym bilen. Kän gözledim, agtardym, idedim, soradym. Üç günüň ukusyzlygy, açlygy meni halys burdy. Sabrym kiparlap, umydym paýawlaberse-de, söýgi uçguny meni hiç ýere goýbermedi. Onuň uç-gyraksyz, çet obalaryň birinde bolaýmagynyň mümkindigi baradaky habar meni diýseň begendirdi. Ýolumy dowam etdim. Esli çakrymdan soň, diýen obam seleňläp göründi. Oba uly däl eken. Aňyrsy-bärsi görnüp dur diýseňem boljak. Ýöne men oba kiçem bolsa, munda uly söýgimiň ýaşaýandygyna ynanýan. Birdenem oba maňa şeýle bir eziz göründi. Oba mähellesi Täze ýyly garşylamak üçin daşary çykypdyr. Kimleriň elinde şar, kimse-de egnine zer atynypdyr. Şeýdip bu şatlyk-şagalaňy synlap durşuma, argynlykdanmy ýa tolgunmadanmy, gözlem garaňkyrap gitdi... Özüme gelsem, meni oba Saglyk öýüne eltipdirler. Daşky otagdan pessaý eşidilýän şepagat uýasynyň sesem maňa barha golaýlaýar. «Mazaly, özüňize geldiňizmi? Biziň obaň oglany-ha däl siz. Täze ýyl gijesi size has «ýakymly sowgat» taýynlan ýalyl-a?! Gaty ýadana meňzeýäňiz, üstesine-de, üşäpsiňiz. Onuň sesi oglan dünýämi çepbe-çöwürdi. Ol alkymyma gelip, maňlaýyma ýyly hasany ýapdy. Bokurdagym dolup, sesim titredi. — Senmi bi? Seň şo-ol öňküligiň, üýtgemänsiň. Ýöne hemişeki owadan gözleriň nämüçin gamgyn balkyldaýar? Ol bu diýenime allaniçigsi bolup, gatyrganjak ýaly etdi. — Diýýäniňiz näme? Meni biri bilen çalyşýan-a dälsiňiz?! Men-ä sizi tanamok. — Ýalbarýan. «Tanamok» diýme! Ikimiz bäsleşdik, ahyry. — Men onuň elinden tutup — men seniň hakyt aşygyňdym — diýdim. Ol owadan gözlerini tegeläp maňa seretdi. — Hawa... Tanadym... Sen-ä «Tahyr», menem «Zöhre» bolupdym. Ýöne haýyş edýän, elimi goýberiň. Gitjek ýerim ýok. Eger söýgiňi wagtynda aýdan bolsadyň, munça ýoly sökmeli bolmazdyň... Aýyp görmeseň, menem bir zat aýdaýyn. Men şol gezek awtobusa münenimizde-de, meni öýe ugradanyňda-da bir zatlar diýeriňe garaşypdym. Çünki söýgüden doly gamgyn gözler meni aldym-berdime salypdy. Aýdaýarsyň öýtdüm. Şonda senden az-kem göwnümem galdy. Ýöne nädeýin, men gyz ahyry! «Aýtjaklaryňa düşündim» diýäýjegem boldum welin, gyz ejabym meni saklady. Ýadyňa düşýärmi, bir ýola jaň edeňde: «Ýene şol bäsleşigi sorajak bolýaňmy?» diýipdim. Sen bolsa sakynyp, telefony gaty çalt goýduň. Şol iň soňky jaňyň boldy. Men öz duýgymda aldanandyryn öýdüp, belgimi çalyşdym. Giň şähere sygman, tejribeligimem şu çet oba ýazdyrdym. Şonda-da undup bilemok, bagtym saňa bagly ýaly boldy durdy. Bagyşla, bu sözleri saňa öň aýtmaga gyzlyk mertebäm ýol bermedi. Şu Täze ýyldan soň bolsa, enem-atamyň diýen ýerine durmuşa çykmaga söz berdim. Ynanaý, senden umydym üzülensoň şeýtdim. Joralarymyň barysy maňa ynanma diýipdiler. A men olara pitiwa bermän, seýilgähli günleri, birki minutlyk jaňlaşan pursatlarymyzy ýatlap ýaşadym. Söýgimiziň nyşany hökmünde saňa bir zatjyk sowgat hem alyp goýdum — diýip, goşa uçgunjygy torbasyndan çykardy. Onuň begenç gözýaşlary eňegine syrygyp gitdi. Men çekine-çekine onuň maňlaýyna düşen ýüpek saçlaryny sypadym. Indi men oňa arkaýyn söýgi sözlerini aýdyp bilýän. — Meni bagyşla, ezizim! Esasy zat, bu Täze ýylda bir-birimize gowuşdyk. Bu Täze ýylyň bize bagt bijesini buşlajagyna ynanýan. Ol çygjaran gözlerini süpürip, şeýle bir ýylgyrdy welin, heý goýaý! — Ýör, onda uçgunjygymyzy ýakaly!.. Ümsüm obaň tämiz Asmanynda dürli-dümen yşyklar peýda boldy. Hawa, soň ýene ikisi ýandy. Şol ýanan yşygyň sagady, sekundy häzirem ýadymda. Ol 1 minudy kem 12-de ýanypdy... Ýolaman GURBANOW, Döwletmämmet Azady adyndaky Türkmen milli dünýä dilleri institutynyň mugallymy. | |
|
√ Ýolagçy / hekaýa - 12.01.2024 |
√ Шер аминь / рассказ - 20.01.2024 |
√ Kaşgarly sözlügi ýa-da iki sürtük / nowella (18+) - 12.02.2024 |
√ Kyrk ýyldan soñ gaýdyp gelen şol aýazly gün / hekaýa - 19.01.2024 |
√ Mertlik hemme kişä berilmeýär / hekaýa - 16.01.2024 |
√ Başky söýginiñ müşki / hekaýa - 04.01.2024 |
√ Ahmyryň awusy / hekaýa - 13.01.2024 |
√ Ýat şäherdäki üç myhman / hekaýa - 13.01.2024 |
√ Gara gözli söýgi ýaşaýarka... / hekaýa - 17.01.2024 |
√ Çöldäki jaň sesleri / hekaýa - 06.03.2024 |
Teswirleriň ählisi: 8 | ||
| ||