Baýguşlar

BAÝGUŞLAR

Biri-birisini başda bir goldap:
"Seniñki rast-da, seniñki rast".
Köne tama gelip gondular bile,
Ýaşaldy biraz.

Bir gün aýjyn sesli biri gygyryp,
Beýlekiñ ukusyn bozdy oslagsyz.
- Gerekmejek wagty ses etme how, sen!
- A sen, biwagt çagy ýatma islegsiz.

- Maña "sen" diýýärmiñ, gowsy gümüñ tap.
- Ýok, asla bu köşki taşlap gitmerin.
- Hä... seniñ bir... ine, taşlap gitmeseñ!
Şagallara şam ederin etleriñ.

- Gözüñi akdyryn, ynha, gör-de dur.
- Men seniñ diliñi sogyryn şeýdip.
- Men seni ganatdan aýraryn anyk
- Sesiñ çykmaz ýaly ederin gaýdyp.

...Aý, garaz, henizem şo köne tamy,
Özara paýlaşyp bilenokmyşlar.
Oña derek bir-biriniñ etini
Iýýärmişler...
Ýöne ölenokmyşlar
Baýguşlar!

Ahmet MÄMMEDOW.