Çöplemeler

ÇÖPLEMELER

Iki zenanyñ gürrüñinden:
- Meniñ dikdurma bagşylara nebsim agyrýar.
- ?!
- Bendeler gedaýçylyga ýüz urupdyrlar.

* * *

Halk oýunlary boýunça geçirilen ýaryş baradaky reportaždan:
"...ata-babalarymyzyñ bize miras goýup giden "keçe-keçe" diýen oýnunda Gözel Döwranowa kompýuterde gysga wagtyñ içinde garşydaşlarynyñ birinden galanyny puçlap, gizlenen zady tapmagy başardy."

* * *

Özüni ussat satiraçy hasaplaýan ýazyjy ahyry eserine däl-de, özüne gülünýändigine göz ýetirdi. Ol "Men şat" atly eserini ýazmaga oturdy.

Juma ŞAMYRADOW.

* * *

- Şepe, dişler-ä altyna öwrülendir.
- Indi akylyñam durlanaýasa...

* * *

- Başlyk aga, gazetde obamyzyñ köçelerini tankytlapdyrlar.
- Ýý-ak, senem-ä: "Köçelerimiziñ ýakyn günlerde daş dökülip asfaltlanylmagy üçin alada baryny edýäris. Bu babatda degişli çäreler görüldi" diýipjik, jogabyny nagt edäýmezlermi...

Gylyçmyrat AŞYROW.

* * *

Telefon gürrüñinden:
- Allo, haçan biziñ jaýlarymyza gyzgyn suw goýberýärsiñiz?
- Sowuk suw tapsak gyzdyryp goýbäris.

Amangeldi OJAROW.

* * *

- Adamlar, hol ýazgylary üns berip okañ! - diýip, ýolagçylardan pul ýygnap ýören sürüji ýigit gapynyñ ýokarsyna elini uzatdy. Ol ýerde "Awtobusa biletsiz münen ýolagça üç manat jerime" diýlip ýazylgy.
- Inim, ol diýeniñ-ä düşnükli, ýöne puluny alyp, ýolagça bilet bermedik sürüjä näçe manat jerime salnarka?
- Ä!!!

Omardurdy HAPBYÝEW.

* * *

Ýygnakda bir işgäre işe gijä galyp gelýäñ diýip igendiler welin, ol:
- Galat aýdýañyz, biziñ ata-babalarymyzda-da işine gijä galýany ýokdur - diýip, gaty añyrdan tutdy.

* * *

Başlygymyz bilen işdäki kemçilikler, olary düzetmegiñ ýollary barada maslahatlaşjak bolanymyzda, ol: "Men şolary-da bilmeýändir öýdýäñizmi, ownukçyl bolmañ..." diýip, üstümize herreldi. Ertesi raýon ýygnagynda şolar ýaly kemçilikleriñ öñüni almak barada aýdylandan soñ bolsa, kärhanamyzyñ işgärleriniñ ýygnagyny çagyryp, iki sagat takal okady.

* * *

Saryny görsem gaçyp ýörün. Dört ýyl mundan ozal gelip sygrymyzyñ boşanandygyny aýdypdy. Şondan bäri gören ýerinde: "Ýýak, size şol gezek nähili uly ýagşylyk etdim" diýip bizar-petimi çykarýar.

* * *

Men-ä obadaşyma bir deñ-duşumyzyñ gije-gündiz hars urup, janyna haýpy gelmän, zat ýygnajak bolup ýörşünden zeýrenip gürrüñ berdim, ol hem: "Aý, ol Taññy akylyñ öýüdir" diýip içimi ýakaýdy.

Keşşik ANNAÝEW.

"Edebiýat we sungat" gazeti.