■ ENŞALLA...
Saňa kän zat söz bermäýin,
Umytlaryň boş çykmasyn.
Da:şdan gurlan öýümizde,
Hiç wagt göwnüň ýykmaryn.
Aldamaryn, aglamarsyň
Sagada bakyp gijeler.
Çagalarmyz hor etmerin,
Oýunjak, köke-süýjüden.
Gözüm mydam köpi islär,
Göwnüm ýanyda azlygyň.
Gezýän çyg toprak üstünde,
Mümkin däl ýalňyşmazlygym.
Mümkin däl ýalňyşmazlygam.
Seni syr deý gorap, ýarym –
Meni söýen gözleň bilen,
Dünýäň alnyndan ogşaryn...
Saňa kän zat söz bermäýin...
■ EÝ, ÝAR!..
Yşk gaýnaýar dabanymda,
Dilim düwün – düwün, eý, ýar!
Posa küýsän çigildem deý,
Jana ýakyn bakyşyň bar.
Güldür – güldür akýan durmuş,
Ters etdi sag-u-solumy.
Lebler ýüzbe – ýüz bolanda,
Unutdym menzil – ýolumy.
Boýy ýeten bir bag kimin,
Bu baharda durduk güle.
Indi asla dymyp bolmaz,
Diňip bolmaz ömür bile!
Ýeke sözüň gurbany men,
Dilim düwün – düwün, eý, ýar!
Ah, sen şeýle uzakmydyň?!
...Dabanymda ot gaýnaýar.
■ DUÝGURLYK
Günleň doguşyndan bilerin halyň,
Günleň batyşyndan bilerin halyň.
Posaňdyr gökdäki süýnen ýyldyzlar,
Seniň maňa, gara gözli, ykbalym!
Günleň doguşyndan bilerin halyň.
Aýnaňdyr dodagy gülýän ümsümlik,
Didelem daşyna oralan gaby.
Ýollar bir – biriniň dowamyka, heý,
Bu goja dünýäde aýralyk barmy?!
Aýnaňdyr dodagy gülýän ümsümlik.
Ynjalman biwagt öwüsse şemal,
Hem ol sowuk düýşler kaksa gapymy.
Şygryň gelişinden bilýän seň halyň,
Bir ädim, älemiň uzak – ýakyny.
Ynjalman biwagt öwüsse şemal.
■ BIZ...
Gözleriň üsdüme serpildi suw deý,
Gör, ne eräp gitdim, ne-de doňdum men.
Ýüzüň Kyblam ahyr bagtyň öňünde,
Adyň dogam bolup arşa çogduň sen!
Lebleriň kinesin ýazdym ýaz bilen,
Elleriň elimde sabyr hem takat.
Seň bile başladyk baharyň başyn,
Seň bile ykbala goýarys nokat.
■ ÝAZ GIJESI
Deňiz häzir gün berenok,
Ümsüm kenary gyjyklap.
Biz bärde durus, sen meni
Gaşlaryň bilen gujaklap.
Ýaz köýnegin serdi baga,
Baglar juda agras, agyr.
Bu agşam seniň ýeriňe,
Kölegäňde gezýär şygyr.
Şäher gözüni tegeläp,
Kä ýola, kä gijä bakýar.
(Irgözinden uklaýjakdy,
Içinde ýyldyrym çakýar).
Bizi görse utanar diýp,
Ertir, (häzir serhoş deňiz.
Hem o ýalaňaç ýyldyzlar),
Bärde durus ikimiz...
■ ELLERIŇE ÝALBARDYM...
Ellerňe ýalbardym, “ýok” diýdi, dözmän,
Dideleň suw boldy dyzyna çöküp.
Meni ykbalyňa öjükdirýär yşk,
Gözýaşyň ýoluma daş kimin döküp.
Saralan ýaprak deý syrylyp ýörün,
Arzuwlam ýellere boldy bahana.
Saňa... diňe saňa garaşypdym men,
Iller garaşanda bagta, bahara.
Ýüregmiň sesini aýak sesiňe
Düzdüm, “gijikmäýin dem salym” diýip.
Ellerňe ýalbardym... dözmänsoň dünýä,
Aýlanýar daşymda, gör, seni geýip.
■ YLAHY SUNGAT
Lebleriňe dökülipsiň,
Güneş bolup, gülki bolup.
Kirpikleň ýeli üwreýär,
Ýazyň göwni, görki bolup;
Lebleriňe dökülipsiň
Sen janly sungat eseri,
Sygdyryp bilmän içine
Dünýä maý gözleýär, suw deý
Saçlarňy doýup içere.
Sen janly sungat eseri.
Arzuwlar çyna aşykdyr,
Kölegäňe üýşdi düýşler.
Gözlerim hopugýar, läläm,
Bagtmy bu, puşmanlykmy?!
Arzuwlar çyna aşykdyr.
Zemin däl, gülleýär alnym,
Galamym gaş kakýar ýene.
Owjuma alyp deňizler,
Baglary oýarýan, ine!..
Zemin däl, gülleýär alnym.
■ SORAG
Düwünçek deý düwülýän men,
Gyýlamok her geçen güne.
Ulalmakdan däl, dogrusy,
Seni kän alýan içime.
Unudardym sähel galsa,
Arman ilki ýitdim özüm.
Dilim iňňäniň üstünde,
Gülübersin gülse ýüzüm.
Seni söýenim hak, ýöne
Tutup görmändim eliñden.
ýitsem-de ýaşaýan entek,
Ömrüm - söýgime delildir.
Dogrusy, hiç düşünemok,
Kalbymdadyň hem ýanymda...
...Sen nä sypyp gitmelimi,
Men eliňden tutmanymda?!
■ AÝRALYK
Düýn agşamky yhlasymy unutdym ak säher bilen,
Ýüz bersem ýüzin düşürdi ykbalymy takat-sabyr.
Seni söÿen günlerimiň ezýetini çekýän indi,
Bu güýz sensiz geljek günleñ goly bagly azabydyr.
Jeýhunyñ suwy azalyp, dodagy kepän kenarlañ,
Kenarda uklan durnalar oÿarmaga dözemok hiç.
Sen henizem öýkelimiñ, öz göwniboş şahyryñdan,
Güÿz gündizleñ gadry ýokdur, gijeler has göze ilgiç.
Saryýagyz oktýabr, goñras ýüzli noýabr,
Galamymy çişiripdir ýatlamalañ ysyndan.
Başym çalarÿar diÿmesem, mañlaÿym-a şol öñki,
Sary sakgal oglanlygym ýetip gelýär yzymdan.
Saña meñzeş oktýabr, maña meñzeş noýabr,
Bu göwräm peje öwürdi (belki, ykbalym şeýledir).
Çal bulutlar gözi bilen sorup güÿjüm-kuwwatymy,
Meni sensiz hassa edýär howa hem asman şeýle bir.
■ SYNAG
Durmuş “synag” diýerdiler,
“Çykar ol hökman garşyňa”.
Men durmuşa garaşypdym,
Seni çykardy garşyma.
Gözüň gözüme garyşdy,
Ömrüm garyşdy eliňde.
Kalbym bir çemçe suw bolup,
Kirpikleriňde elendi.
Ýüregiňi aýamadyň,
Aýamadyň päk söýgiňi.
Men sensiz şygry nädeýin,
Sensiz yşk bormy, söýgülim?!
Durmuş “synag” diýerdiler,
“Çykar ol hökman garşyňa”.
...Men durmuşa garaşypdym,
Seni çykardy garşyma.
Enwer NYZAMOW.
