Gözüme ilenok saçymyñ agy...

GÖZÜME ILENOK SAÇYMYÑ AGY...

''Sakgalymyñ agy maña gam degil''
Kemine.

Gözüme ilenok saçymyñ agy,
Duýgym habar berýär meñ ýigrim bäşden.
Göwnümde joş urýar ýigitlik çagy,
Kuwwat alýar bu sapaly durmuşdan.

Altmyş üçi men-ä asla duýamok,
Eýerilen maksat goldaýar mydam.
Ýigrim bäşe-ýetmişe parham goýamok,
Jahyllarça sagdyn urýaryn gadam.

Söýýärin döwrümiz, söýýän durmuşy,
Her bir täzelikden ylham alýaryn.
Galam - kagyzymyñ erşi-argajy
Göwne makul bolsa, bir gez galýaryn.

Meñ ýüregim sagat deýin saz urup,
Talap edýär aýak çekmän ätmäni.
Elmydama duýgur garawul durup,
Wada berýär ýüzden añry ötmäni.

Dyzym epmän juwan geçirin ömri,
Ömür hyzmat eder meniñ ömrüme.
Büküp bilsem gerek goşar deý demri,
Garşylyk döz gelmez meniñ emrime.

Sür galamy dynman, kagyz güllesin,
Goluñda egsilmez güýjüñ-çakyñ bar.
Döret, seni döredeniñ goldasyn,
Ýaşa ýürek, ýaşamaga hakyñ bar!

1957.

■ HALYPAM

''Göwnüm islär gezsem dünýe-älemi ㅡ
Ganatym ýok, uça bilmen ㅡ neýläýin?!''
Magtymguly.

Eý, halypam, ýüze çykdy arzuwyñ,
Täzeledik köne ㅡ lagşan dünýäni.
Altyna gapladyk seniñ her sözüñ,
Milliona ser urýar kitabyñ sany.

Her bir nesliñ deñýär özün bir hana,
Topragyñy bezýär, gyşam ýazlarça.
Türkmenistan öwşün atýar jahana,
Zehinli şägirdiñ bu gün ýüzlerçe.

Döwrüm maña ganat berdi, uçýaryn,
Baryp bilsem göwnüm islän ýerine.
Beýik ummanlardan asan geçýärin,
Aýlanýan men ýer ýüzüniñ baryna.

Bu gün halkym bilen menem bir sanda,
Bagtly döwre gadyr-gymmat goýýaryn.
Ýer ýüzünde, deñizde hem asmanda,
Öz erkli ㅡ özüm häkim saýýaryn.

Gaýduwym ýok her zat ýüregme düwsem,
Ülkäm maña islän zadyn eçilýä.
Aziýa, Afrika, Ýewropa barsam,
Hezzet-hormat bilen gujak açylýar.

Myhman boldum dünýäñ dürli künjünde,
Gözel ülkäm deýin görmedim ülke.
Söýýän öz ülkämi şonuñ üçin-de,
Adalatyñ altyn köşgüdir, belkä.

Arzuwyña amal edip, halylam,
Señ ýerñe-de ganatymy gerýärin.
Asmana ser urýar meniñ hem depäm,
Halkym bilen sanmaz bagta barýaryn.

1959.