Gülnar Geldimyradowadan

SORAG

Bedeniň gagşapdyr, gowşapdyr salyň.
Kimiň derdi seni garratdy beýle?
Hatda meňkiçe-de ýok ýaly halyň,
Içini dökdümi nalyşly bende?
Senem syr saýdyňmy aýdanlaryny,
Göwünlik berdiňmi salkyn saýaňda?
Howurly ýüregiň oduna ýanyp,
Indem saklap otyrsyňmy aýaňda
sary saman ýaly ýapraklaryňy?
Içine sygmadyk derdin üflände
Gussa boýadyňmy öz ykbalyňy?
Başyňy yraýaň, ýüzüňem az-kem
Hälkije bolşuňdan durlanan ýaly.
Men dözmedim seniň agyr halyňa,
Hatda bedeniňem dyrnalan ýaly...

* * *

Şäherde baglaryň badyhowasy,
Säherde sergezdan bolan guşlaryň
owazy günüme goýmaýar meni.
Kagyza sessizje sepen yşkymy
kim görer – düşünmez.
Emma käbiri
görmez – duýar meniň duýýan zadymy.
Aslynda näm üçin geldik bu dünýä?
Hut şu sorag ýaşadýandyr adamy.
Säherde baglaryň badyhowasy
käte ýüregiňi paralap gider.
Gözlerini ýumup gören zadyňy
hakykatdyr öýdüp hamsygarsyň kä...
Jogabyny tapyp bilmän,
Bir günem
oýa mahalyňda gidersiň uka.

29.09.2019 ý.

Gülnar GELDIMYRADOWA.