Watanym meniň

Şyhmyrat Abdyllaýew. 2017. Iýul

Ýetmiş ýaş içinde kyrk ýyl aýralyk
Ony ýat illerde sergezdan etdi.
Keseki ýurdyñ gije-gündüzi
Bal hem bolsa, gara bagryn gan etdi.

Özge iliñ bir gözelniñ söýgisi
Öz iliniñ mährin berip bilmedi.
Ýüzi güne ýanan türkmen gyzynyñ
Bakyşynyñ ýaryça-da bolmady.

Ogul söýdi, gyz erkeläp ulaltdy,
Ýassykdaşy ýat bolsa-da ýakyndy.
Söýgiden dolydy "ezizim" sözi,
Kalba siñen mährin unutmak kyndy.

Agzybir maşgalañ guwanç-şatlygy
Teselli berse-de onuñ göwnüne,
Ata watan ene toprak küýsegi
Özüne çekýärdi günüñ-gününe.

Ýaş ýetmişe bardy, bir gün dillendi,
Maşgalañ jem wagty, ir säher çagy:
"Ogullarym, bu ýurt maña keseki,
Size bolsa gözleñ garasy-agy.

Meniñ ilim, hol, kartanyñ ýüzünde
Gyralary ýaşyl,
Sary zolakdyr.
Otuz ýaşa çenli basan yzlarym,
Şol sary reñke siñip galypdyr.

Nesibe çekipdir, bu ile geldim,
Kyrk ýyl togap etdim halal duzuny.
Mähriban eneñiz hemrahym boldy,
Munda gördim sizi, ogul-gyzymy.

Siz meniñ maşgalam mukaddes öýüm,
Ýüregimden geçip duran ganym siz.
Emma, maña kyn bolup dur ýaşamak
Ata watanymsyz-mähribanymsyz.

Rugsat berseñiz gündogar sary
Ýol alsam diýýärin türkmen ilime.
Töweregniñ gözelligne syn edip,
Bir nazar aýlasam atyz-çiline".

Öýünde gojanyñ sözi hökümdi,
Hormaty ulydy maşgalasynda.
Yzy bilinýärdi gara zähmetiñ,
Mañlaýdaky ýygyrt-ýygyrt gasynda.

Maşgala bir adam ýaly seslendi;
"Bizem ýanyñ bilen bile gideris.
Maşgala başynyñ basan yzyny,
Ömrümüz ötýänçä togap ederis".

Goja ahmyr oýly başyn dikledi;
"Men gitsem dolanyp, gaýdyp gelmerin.
Özümiñ ýurt zaryn çekenim besdir,
Sizem ilden aýra salyp bilmerin.

Ogullarym, ata watan zaryny,
Kalbyny ýaralap, göteren biler.
Aýralyk sebäpli sanjap ýüregi,
Çep gursagna elin ýetiren biler.

Siziñ watanyñyz, ine, şu toprak,
Şu ýere damandyr göbek ganyñyz.
Men watana barýan, alada etmäñ,
Ýerde bolsun siziñ ýasy-ýanyñyz.

Meni göresiñiz gelen mahaly
Eneñiziñ gözlerine syn ediñ.
Meñki diýip biliñ onuñ sözlerin,
Sylagyñyz, hormatyñyz kän ediñ".

Gönükdirip dideleriñ nuruny,
Goja ogullarna dikdi nazaryn.
Agtyklar boýuna-boýuna bökdi,
Göýä, balyjagy bahry-hazaryñ.

Maşgalasy, dost-ýarlary jem bolup,
Uçar meýdanyna süýşüp geldiler.
"Indi ýene didarlaşmak, görüşmek
Nesip edermikä?" diýşip geldiler.

Gulaç ýaýyp demir ganat "Symrug guş",
Mañlaýyny gündogara öwürdi.
Ötüp nije derýalardan, daglardan,
Türkmen topragyna daban degirdi.

Uçar gapysyny açan badyna,
Gojañ ýüzün çaýdy watan şemaly.
Gözlerine surat bolup ýapyşdy
Töweregiñ manzarasy-jemaly.

Dyza çoküp, togap etdi zemini,
Möññürüp-möññürüp sesli aglady.
Ýaş ýeleñler geñ galyşyp durdylar,
Ýaşulylar ahwalyny añlady.

Watan zaryn çeken gojañ ruhun,
Watan öz süññüne çekip başlady.
Wysal boldy aýralygyñ ahyry,
Kalby eräp, ýere akyp başlady.

Birden süýşüp gelen garaja bulut,
Seçeledi ak ýagyşyñ dänesin.
Tolgunmadan ýaña jan beren gojañ,
Ata watan tämizledi synasyn.