DÜNÝÄM!
Nargylyç Hojageldiýewe
Men sensiz ölerin, Dünýäm!
Orta ýolda şehit bolup.
Alnym gara gyşdyr bilýän -
Özüñ ýetiş behişt bolup!
Elendim ýördüm towlanyp,
Çekdim aýralyk günlerin.
Tamdyr oduna çowlanyp -
Hakdan utulan bende men...
Saña aýan, bary aýan,
Jigeri girýan edenem.
Sen meni azajyk aýa -
Başyma soltan ederin!
Gygyrýaryn: Dünýäm! diýip,
Köñlüme kerem düşende.
Kim aýdypdyr - söýgi aýyp
Saçyña gyraw düşende...
Kim aýdypdyr - dutar aýyp
Gaşly ýara dolananda.
Kim aýdypdyr - gül ýar aýyp
Boýnuña gol dolananda!
Ömrüm, giçki güýze düşüp,
Indi kak şiresi damýan.
Gün gyzarikindi, düşün -
Men sensiz ölerin, Dünýäm!..
Baýram JÜTDIÝEW,
Türkmenistanyñ Halk ýazyjysy.
