Rubagylar

RUBAGYLAR

Birsalym boldum gorkuda,
Gezdim bir köne hyrkada.
Gördüm mes şama-şaýyrdy,
Görmedim adam arkada.

04.06.2023.

***

Kalbymdaky aýdymym siz gazalym,
Siziň azaryňyz meniň azarym.
Bir haýyşym “Göwni aýry” diýmäňler,
Siziň mazaryňyz meniň mazarym.

06.06.2023.

Bal diýeniň bilen bal bolmaz, balam,
Ot-iýmsiz har bolar daglarda malam.
“Gury sözden palaw bolmaz” diýleni,
Boş söz bilen ile salmagyn talaň.

08.06.2023.

***
Aý, Güne tagzymyň her gün bagt bil,
Özüň üçin gurlan täji-tagt bil.
Garga gagyldysyn eşdip durmagam,
Özüň üçin berlen pursat – wagt bil.

07.06.2023.

***

Käte düşüp pis adamyň toruna,
Adam özün atýar durmuş goruna.
Diýdi biri: “Gardaşyňdan äge bol,
Gardaş döküp biler awy törüňe!”.

06.06.2023.

***

Gaty gitdi biri, durmady çende,
Il zadyn ogurlap gezdi ol gende.
Herki zadyň başy, soň ahyry bar,
“Gapana düşüpdir – diýdiler – bende”.

06.06.2023.

***

Şükür Huda, gördüm çowluk, agtygy,
(Elli ýaşda ýitirmişem bagtymy).
Saç-sakgalym agarypdyr bimahal,
Bir gözeliň dulugymda şarpygy...

06.06.2023.

***

Oglun söýüp, ejesini terk etdi,
Zalym göwün niçik muňa erk etdi.
Bigäne biriniň gujagyn peýläp,
Garamaňlaý öz-özüni kürk etdi.

07.06.2023.

***

Ataň gadyryny bilmediň başda,
Enäni ynjytdyň, diýdiler: “Ýaş-da!”
... Indi olar uzakda,
Indi olar daşda...

08.06.2023.

***

Ýylan ýasadylar, şir ýasadylar,
Özlerine duşman ir ýasadylar.
Meniň halamaýan Hojagulymdan—
Oba ogrusyndan pir ýasadylar.

08.06.2023.