Rubagylar

RUBAGYLAR

Ne erigiň tagamy bar, ne üzümiň tagamy,
Şir agzy dek açylypdyr goşa gözüň damagy.
Toýy ýalan, öýi ýanan, özi ýaman kişiniň,
Mydam şeriň işiginde, dost tutunmaz henegi.

16.05.2023.

***

Birisi ýaşaýar abraý-at diýip,
Ölýär biri malym diýip, zat diýip,
Bir tanşymyň ne ady bar, ne zady,
Görgüli ýaşaýar ýakyn-ýat diýip.

16.05.2023.

***

El berseň-de, ýel bermegin samsyga,
Samsyk seni satar baryp kümsüge.
Köpeý ogly, dostum diýip ýöreniň,
Özüň ýaly, çalym edýär tomzaga.

18.05.2023.

***

Uzaga gitmersiň çaman at bilen,
Abraý almaň başda ýaman at bilen.
Gardaşyňam bolsa çetde durawer,
Jyn alyşmaz ozal bolsaň jet bilen.

20.05.2023.

***

Bir diýmedim, muny saňa kän diýdim,
“Köşeşer” diýp, il içinde “han” diýdim.
Bir garynda ýatan gardaş bolsak-da,
Sen zerarly mähellede gan iýdim.

28.05.2023.

***

Goýma ýeke, goýsaň borun diwana,
Gelişmez bu ömür garry, juwana.
Yns-jyns bary goşa-goşadan,
Äre hatyn, är gerekdir hatyna.

28.05.2023.

***

Är diýip ýörenmiz heleý keşbinde,
Zenandyr öýdenmiz erkek eşginde.
Ferraşlar dünýäde köpelip barýar,
“Aşyk-magşuk” bir-biregiň yşkynda. ..

28.05.2023.

***

Görene göz, eşidene gulak bol,
Ýala gelen ganjyklara ýalak bol.
Eý, tula, eý, loly, eý, bedibagt,
Äre barsaň, iki günden talak bol.

29.05.2023.

***

“Bir eneden ak-da dogar, gara-da”,
Gürrüň gitdi bular hakda arada.
Her jüre pikirler orta atyldy,
Biri diýdi: “Gabat geldim hara-da”.

29.05.2023.

***

Iki dostuň arasyna çöp düşse,
“Eýle, beýle...” diýip, ara gep üýşse,
Dost näme, gardaşlar däli-diwana,
Köňül weýran bolar azana duşsa.

30.05.2023.

***

Günler, aýlar, ýyllar – ömür geçedir,
Közde ýanyp duran kömür öçedir.
Öňler ertekide halylar uçsa,
Indi weli arşda demir uçadyr.

31.05.2023.

***

Sakal goýberipdir ýaş-ýeleň, beçe,
Ýüze ýelmenipdir bir gara keçe.
Mundan bir ýyl öňem neşekeş Bekgi,
Ile akyl berýär misli bir goja.

01.06.2023.

***

Pyraga deňedi özüni biri,
Gulagym nämeler eşitmiş diri.
Iki sözüň başyn çatabilmedik,
Goýberdi öl ýerde bitegen dili.

01.06.2023.

***
Arykdaky warryldaýan gurbaga,
Nadan sözi sebäp boldy rubaga...

01-02.06.2023.

Niçe döwür niçe göwni jadylan,
Dil ýetirdi karnaý, surnaý, rubaba....

***

Aýdymçy köpeldi, şahyr köpeldi,
Metjitde sakgally jahyl köpeldi.
Gadymýet döwürden gülkiň eýesi—
Nämüçindir gama batdy Ependi...

02. 06.2023.

***

Güni üçin günüsiniň çagasyn,
Allalanyň eşdipmidiň agysyn?
Süleýman soltanyň enesin daglan,
Istemen dünýäde Hürrem söýgüsin.

03.06.2023.

***

Gara çöpür örtüpdir-le ýüzüňi,
Behişt isläp, oda atdyň özüňi.
Nebis jylawyny çekebilmediň,
Ynsap gitdi, ýakdyň dowzah közüňi.

03.06.2023.

• IKILEME

Geýinse geýinsin altyndan zeri,
Diýmerin men oňa ylahy peri...

19.05.2023.