Rubagylar

RUBAGYLAR

Göribiň göwnüniň garasy köpdür,
Ýüreklere salýan ýarasy köpdür,
Ýamanlyk atyna atlananlaryň,
Ýagşylykly işler bagryna okdur.

Bagtdan paýly bolgun, yza galma sen,
Gyzyl güli köki bilen ýolma sen,
Danalaryň akyl-paýhasyn unutma,
Baýlygyň, şalygyň guly bolma sen.

Dile alynmaýan sözlerden sakla,
Gülüp bakýan çöwre ýüzlerden sakla,
Gowy zada gowy diýip bilmeýän,
Şübheli garaýan gözlerden sakla.

Görk isleseň, bägüllere gunça bol,
Göwher daşa deňeseler monça bol,
Göwräň garrap, göwnüň ýaşarar barha,
Aklyňa, huşuňa özüň synçy bol!

Neneňsi ýaşaryn, barmydyr bilen,
Söýgüsiz ýaşalan günlerim ýalan.
Guran söýgi köşgüm boşady galdy,
Arzuwa öwrüldi bagrymy dilen.

Sensizlikden gizläp ýaşly gözlerim,
Tümlükde ýaňlandy zaryn sözlerim,
Dolanmajak günler ýadyma düşüp,
Ýyldyzlarda galdy aýak yzlarym.

Aglanymda ýaş gelsin, goý gözüme,
Mähir bilen nur çaýylsyn gözüme,
Ýagşylara ýoldaş bolup elmydam,
Il içinde sarpa bolsun sözüňe.

Keşdeler, nagyşlar görki ýazlaryň,
Söýgüsinden dörän gelin-gyzlaryň.
Inçeden yzarlap, okap bileriň,
Ene-mamalaryň goýan yzlaryn.

Kär-hünär saýlanda nyşandan bolsun,
Söwer ýar ýürkdeş duşandan bolsun.
Bular ykbalyňa baky söýegdir,
Hünäre hormatyň başyňdan bolsun!

Gahar kapyr, paýhasly bol hemişe,
Kanagatly ýetip biler ýeňişe,
Doýdum diýmez, gulaklaryň, gözleriň,
Ynsaply bol, sabyrly bol her işe.

Gaşlaryma gar ýagsa, özümden sora,
Kirpigimden ýaş doňsa, gözümden sora.
Ala-ýaz deý şatlanyp, gülüp ýöreniň,
Kalby ümürlidir, oň köňlünden sora.

Mejnun bolup köýüp meniň yşkymda,
Şol ýigit özüni urmasa oda,
Yşkyň bossanynda açmaryn gunça,
Söýgi bolup ýaşalmasa dünýede.

Inçeden yzarlap kalbyň ýoluny,
Dutar-gyjak joşdyr mähir goruny,
Ýaýýandyr jahan türkmen sungatyn,
Baky ýüreklerde tapyp ornuny.

Zenany söý sähel zada hoş bolar,
Mähirli sözlere göwni guş bola,
Gadyr-gymmatyna sarpa bolmasa,
Tomusda eremez, bagry daş bolar.

Gülleri ysyndan tanap bolýandyr,
Bal arysy güle saýlap gonýandyr,
Gursagna söýgüsi sygman ýazlaryň,
Zemine gül paýlap, güle dönýändir.

Dostum bolsun belent dagyň gaýasy,
Goý, ynjan köňlümiň bolsun söýesi.
Başa iş düşende atylan ok deý,
Her pursatda ýürekden gelsin köýesi.

Eneleň dogasy jennet adama,
Dogan gardaş goldap dursa mydama,
Perzentleriň alkyş-abraý alsalar,
Iň bagtly ynsansyň, batmarsyň gama.

Ir säherden dogýan güne salamyň,
Özüňe gaýdarmyş bezäp jemalyň,
Sen hakdaky habaryny diňledim,
Saçym sypap geçýän sergin şemalyň.

Oguljennet NAZAROWA,
Daşoguz welaýatynyň Akdepe etrabynyň 20-nji orta mekdebiniň mugallymy.