Watan

WATAN

Aýra düşen ömürbaky gezermiş seniň zaryňda,
Ygtykat deý mukaddes sen hem jandan eziz, Watan.
Kyn günüň hyzmatyňa taýyn men huzuryňda,
Çaganyň kalby deýin duýgulam tämiz, Watan.

Senden aýra ýat illerde kemis ýaly meň dokuzym,
Söýdüm dutar haýbatyny, näzini näzik gopuzyň,
Desterhan deý açylanda rysgaldan doly atyzyň,
Beýle uly sahylygy görmändim heniz, Watan.

Topragyňy togap eýläp, göz nuruma deňänim,
Mertebäňi depeletmän, öz aryma deňänim,
Aladaňy ýada salsam, keşbin gördüm enäniň,
Ogul parzyn haklamaga bir ömür ejiz, Watan.

Lebzim birdir,
ýüzüm birdir,
senem ýeke-tägim sen,
Özüm pukara bolsamam, başda jyga-täjim sen,
Ynsap ýaly,
ygrar ýaly,
hiç bozulmaz çägim sen,
Ömürboýy arzylanym –
enem deý ýalňyz Watan.

Gurban GURBANOW.