Wesýet

WESÝET*

Ýoldaşlar, ýurdumyñ azatlygyny
men görüp bilmesem, onda meýdimi
äkidiñ Türkiýä, jaýlañ şol ýerde -
öz belet obamda jaýlañ siz meni.

Arasynda Osman bilen Äşäniñ
ýataýyn men ebedilik-hemişe.
Osmany öldürtdi zalym Hasan beg,
çaganyñ üstünden gidipdi Äşe.
Çowdarynyñ arasynda - meýdanda
çagalap, dünýäden ötdi görgüli...
Gowy bor deñinden traktor ötse,
geljek döwrüñ günleriniñ bir güni.

Säher benzininiñ hem täze adamyñ
ysy ýaýrar biziñ mazatystana.
Žandarmdan gorkman ýaşar zähmetkeş,
kollektiw eýe bor bagy-bossana.

Gurakçylyk bolmaz. Her maşgalada
günde öýüñ içi bolar ala-ýaz.
Zähmet hakda aýdym aýdar adamlar,
bize welin gelip ýetmez ol owaz.

Ölen adam kördir, laldyr, sokurdyr,
Ölen adam çüýrär ýatar toprakda.
guran bir çybygyñ çüýreýşi ýaly,
Diñläñ, meniñ sözüm başga zat hakda:

Meniñ birçak aýdan aýdymlarymdyr
zähmet hakda aýdyljak şol aýdymlar,
zähmet hakyndaky ol aýdymlary
giç aýdarlar ol ýerdäki adamlar.

Iñ ilkinji traktoryñ çyzgysy
çyzylmanka, gördüm ýanýan benzini.
Meniñ burnum onuñ ysyny datdy,
Indi diñläñ gürrüñimiñ yzyny.

Goñşy gabyrdaky Osman hem Äşe,
azatlygyñ gelip ýetjegni añman,
bagtly durmuşy arzuw edendir,
Özüm-ä şeýle diýp edýärin güman.

Ýoldaşlar, ýurdumyñ azatlygyny -
şanly güni görüp bilmesem gerek.
Meni jaýlañ Türkiýede. Gabrymyñ
üstünde bitse bes birje ak derek.

1953.

Nazym HIKMET.
_____________________________
* Şahyr bu goşgyny agyr kesellände (1952-nji ýylyñ güýzünden 1953-nji ýylyñ ýazyna çenli) ýazypdyr.

Terjime eden: Allaberdi HAÝYDOW.