Ah, bu gyzlar...

AH, BU GYZLAR...

Sallanjyrap, erkiñ alar eliñden,
Ah, bu gyzlar, ah, bu gyzlar, bu gyzlar.
Lak ataýsañ, bela goýar diliñden,
Ah, bu gyzlar, ah, bu gyzlar, bu gyzlar.

Saçyña seredip "Daýy" diýýärler,
"Siz indi öýdäkiñ paýy" diýýärler.
"Biz göçgünli jahyl taýy" diýýärler,
Ah, bu gyzlar, ah, bu gyzlar, bu gyzlar.

Sizi Gün deñinde goýasym gelýär,
Sönüp däl alawlap, söýesim gelýär,
Käte "Şeýtanjyklar" diýesim gelýär,
Ah, bu gyzlar, ah, bu gyzlar, bu gyzlar.

Ýöräninde çeşme kimin akymly,
Gözlerinde jemlän ähli akylny,
Duýanoklar, wah, hemmä-de ýakymly,
Ah, bu gyzlar, ah, bu gyzlar, bu gyzlar.

Peýda ýokdur söýgä dahyllygyñdan,
Çekiber minneti şahyrlygyñdan,
Habary ýok göwnüñ jahyllygyndan,
Ah, bu gyzlar, ah, bu gyzlar, bu gyzlar.

Toýly ÖWEZOW.