Düşünemok

DÜŞÜNEMOK

Şükür, täleý bizi aýra salmady,
Bir-biregi deň hem asylly söýýäs.
Käte sähralaryň zaryny çekip,
Ikimizem daglaň çagyrşyn duýýas.

Sen ähli kişiden hem ähli zatdan,
Ýadasaň, daglara seýrana gidýäň.
Elmydama meniň ýanymda bolsaň
Dünýämde ähli zat oňatlyk öýdýän.

Gözel pursatlary dostlaňňa paýlap,
Unudaňda bütin barlygy birýan.
Men ajap zatlaryň baryny ilki
Seniň bilen paýlaşmaga howlugýan.

Howlugýan seň bilen soňuna çenli
Gözellikleň gapysyny açmaga.
Düşünemok, sen nämüçin elmydam
Taýyn gözellige mensiz duşmaga?! 

■ Umyt

Umydymy aldyrypdym,
Gözüm açdy halypa.
Gaflat deňzini boýlapdym,
Açdym täze sahypa.

Bulutda azaşan Aý deý,
Käte bir görünýär daşda.
Heniz kiçijik, gögele,
Aýny kämilleşmek ýaşda.

Täzeden doglan umydym,
Enä hamrak çaga ýaly.
Ol ulalar, juwan çykar
Hem unutmaz sebäpkäri.

Meňli AŞYROWA.