Göwün bilen söhbet

GÖWÜN BILEN SÖHBET

Gussa bilen darygamda,
Kyssa bilen birigerin.
Bir gün eýýäm ýok bolsamam,
Goşgulamda dirilerin.

Gudrat, keramat bu ömür,
Käte Kuýaş, käte ümür.
Maksat başa ne gelse-de,
Ynsan bolup galmak meger.

Şeýle lezzetli eger-de,
Ynsap mydam öňde dursa.
Sapalak atanda nebsiň,
Paýhasyň dogryny görse.

Bähbidinden geçen käte,
Hasaplanaýýaram akmak.
Belki barça başartmaýar,
Il-günüň ýüküni çekmek.

Iň bolmanda iň kiçijik,
Zat babatda etseň ynsap.
Şeýde-şeýde kemal tapar,
Erki ýeňilmezek ynsan.

Wah, ejiz ýeri şonda-da,
Erki bar, erksiz ynsanyň.
Özüňi ýerinde goýsaň,
Çatarmy heý-de ynsabyň.

Ilki bilen özümizden,
Başlabilsek sözümizden.
Talapkär bolup elmydam,
Düzgüninde öýümiziň.

Iň ilkinjem pälimiziň
Üstünde kän işläbersek.
Gaharyň jylawyn çekip,
Dilimizi “dişläbilsek”.

Köpelmezmi dost-doganlyk,
Artmazmy dünýäde deňlik.
Bir-birege ynam artyp,
Köňle düşer hatyrjemlik.

Öz-özüňden hasap sorap,
Bolsaň geçirimli özgä.
Zybany ýagşy dilegli,
Bolmak nesip etsin hemmä!

Jümjüme.