Heýkel ýasamaga synanyşyk

HEÝKEL ÝASAMAGA SYNANŞYK

Aýsyz gije ýaly gara saçlarňy
sypalap-sypalap ýasadym, ýöne
saçlaryň derýa deý tolkunanokdy.
ýasadym derek deý rast aýaklarňy,
aýaklar zeminde sallananokdy.

Almaň reňki siňen ellerňi seniň
sypalap,
apalap ýasadym, ýöne
şöhlesi ýokdy.
Barmaklarňy sanap,
sypap ýasadym,
olar gamyş ýaly galdyranokdy,
dyrnaklaň kümüş deý ýaldyranokdy.
Ýasadym biliňi — küýzäň boýny dek,
biliň rezin ýaly towlananokdy.

Goşa gumry ýaly goşa göwüsler
näçe sypasaň-da,
näçe söýseň-de,
uçup gitjek guş deý galkynanokdy.
Galamper deý kirpikleňde
okgun hem ylham ýokdy.
Pisse ýaly lebleriňde
teşneligme melhem ýokdy.

Seni sypap ýadadym men,
Seni synlap ýadadym men.
Bir seretsem,
pisse lebleriň ýumuk,
Bir seretsem,
gunça gözleriň ýumuk.

Ýumuk lebleriňe leblerim goýup,
öpdüm seni,
ýumuk lebler açyldy,
açyk lebleriňe gözlerim goýup,
öpdüm seni,
süzük gözler açyldy.

Ýylady ýürekde doň ýatan ganyň,
Men saňa janymdan jan berdim,
janym.
Öz ýasan gözlerme boldum men bendi.
Galamper kirpigňi kükregme gezäp,
sen meniň janyma hyrydar indi.

Atamyrat ATABAÝEW.