SAZLAŞYK
Ýene saňa
Ýene saňa ymtylýan
Ýene seni
Ýene seni küýsenýän
Tolkuna baý deňizlere
Giň saçakly ýaýlalara
Giň gujakly asmanlara ymtylýan.
Seni agtaramda
Özümi tapýan
Özümi tapamda
Saňa birigýän.
Bilmedim!
Bu eriş-argaçly köne dünýäde
Haýsy ýumaklarda işlipdiris?
Uç-gyrasyz
Tarlar ýaly gurulyp
Haýsy kirişlerde
Sazlanypdyrys?
Ýene saňa
Ýene saňa ymtylýan
Bir dutarda
bir şiwede
bir sazda
Bir aýdymda
bir damakda
bir sözde.
■ DÜWÜLEN HARPLAR
Seslendim
Ses bermediň
Dillendim
Dymdyň, hiç dillenmediň
Ýazdym
Ýazanlarym goşgy boldy
Ýaradymy göwnüňe
Ýa sen göwün bermediň!
Ses bermeseň
Sesim kesiler gider
Dillenmeseň
Dilim eziler gider
Goşgularma welin
Göwün bermeseň
Sesler harpa döner
Tirkeşer gider ...
Ahlar , Ahmyrlar
Biçäre, Bitagat Sözler düzüler
Çolan deý, çolanar
Düwün düwüler...
Gapur HOJA.
