Çagalar üçin goşgular

BÄŞLIK

Gijöýlänler men ýene,
Mekdepden gaýdyp geldim.
Itim öňümden çykdy,
— Näçelik aldyň? diýip,

"Bäşlik" diýip, pert aýtdym,
Edil öňünde öýüň.
Itim diýdi ýalmanyp,
— Getir, ýalap göreýin?

Agageldi ALLANAZAROW

IKI GÜJÜK

Çekeleşip daşarda
Oýnaýar iki güjük.
Olaň biri ullakan,
Beýlekisi kiçijik.

Keýpiň gelýär olara
Dursaň biraz syn edip.
Ikisi bir çybygy
Çekeleýär jan edip.

Ulusy alyp gaçýar
Kiçem ondan galanok.
Şol çybykdan başga zat
Gözlerine ilenok.

Kowalaşýar, ylgaşýar
Iki güjük hyr-da-hyr.
Kiçi gaty mekirje,
Ulyň häsiýeti gyňyr.

Töwerekde çybyk kän,
Birem ondan aljak däl.
Hersinde biri bolsa,
Onda oýun boljak dal.

Kakabaý GURBANMYRADOW

GURJAK

Jeren örän eý gördi
Owadanja gurjagyn.
Eşijegin geýdirdi,
Darap onuň gulpagyn.

Göterdi howla çykyp,
Soň hüwdüläp ýatyrdy.
Oýanýança gurjagy,
Ýüzün ýelpäp oturdy.

Şol wagt geldi gapydan,
Jerenjigiň jorasy.
— Oýnap göreýin— diýip,
Gurjagyny sorady.

— Gurjagym ýatyr meniň—
Diýdi– ony dileme.
Olar gurjak turýança,
Oýnadylar bileje.

Nobatguly REJEBOW

KEMALYŇ GÜJÜGI

Ýörme-da, Kemal,
Gujagňa alyp.
Gitdim-ä indi
Biraz ulalyp.

Hemra gülleri,
Basjak bolanda.
Jahany owlak,
Süsjek bolanda.

Aldym öňüni,
Şobada ýetip.
Edip haw-haw-y,
Haýbaty atyp.

Çykardym gurjak
Gaçanda salma.
Däl men-a kiçi,
Gujagyňa alma.
Gitdim ahyry
Biraz ulalyp.
Utanýan dursaň
Gujagyňa alyp.

Azat RAHMANOW