El çarpyşlykdan terakta perdäniñ añyrsy

EL ÇARPYŞLYKDAN TERAKTA PERDÄNIÑ AÑYRSY

Netanýahunyñ hormatly myhman hökmünde çagyrylan amerikan kongresinde el çarpylyp garşylanmagy...
Ýa-da "Hamas" guramasynyñ Syýasy býurosynyñ başlygy, parahatçylykly ýaraşygyñ tarapdary Ysmaýyl Heniýeniñ Tähranda MOSSAD-MRU dildüwşügi bilen öldürilmegi...
Bu iki wakanyñ üstünde "syýasy hristianlyk" taýdan durup geçeýin.
Ilki birini tanadaýyn: Wilýam Hehler (1845-1931).
Angliýanyñ Protestant-anglikan buthanasynyñ popydy. Jöhitleri hristianlyga çekmek üçin 1809-njy ýylda gurlan "London jöhitleri" jemgyyetiniñ agzasydy we sekretarydy. Maksatlary şudy:
Isanyñ Mesihligini ilki iudeýlere (jöhit dinine uýýanlara), soñra iudeý dällere yglan etmek, buthanany iudeý däplerini öwretmäge itermek, jöhitleriñ Eretz Ysraýyl ýurduna gaýdyp getirilmegini gazanmak, iwrit-hristian (Mesih-iudeý) hereketini goldamak...
Pop Hehleriñ jemgyýetde aktiw bolmagynyñ sebäbi kakasy Dietriçiñ jöhitsöýüjiligidi.
Hehler iudeý ylahyýeti, palestin taryhy we Isa Mesihiñ "Ikinji geliş" teoriýalary bilen gyzyklanyp, ylmy-barlag işlerini geçirdi.
Ylmy-barlag işleri üçin Russiýa gidende jöhitlere garşy alnyp barylýan rasizm (pogrom) ýiti täsirini ýetirdi. Gaýdyp gelende Stambula sowuldy, niýeti Abdylhamyt II-ni görmekdi.
Jöhitleriñ Palestina gaydyp gelmegine rugsat soraýan hatyna iñlis ilçihanasy garşy çykdy. Hehler osmanly köşgüne ýetip bilmedi...

* * *

Hehleriñ birnäçe kitaby çap edildi: "Jöhitleri söýmek hristianlygyñ borjudyr". Ol jöhitleriñ Palestina gaýdyp gelmeleriniñ Mesihiñ ikinji gelişiniñ birinji şertidigine ynandy...
1896-njy ýyl. Tötänlikden garşysyna biri çykdy. Teodor Gersl (1860-1904)...
Has dogrusy kitap dükanynda Gersliñ nemes dilinde täze çykan "Jöhit döwleti" (“Der Judenstaat”) döwrebap sionizmiñ iñ täsirli ilkinji neşiri bolan bu kitap aalynda "Rotşildlere ýüzlenme" hökmünde ýazlypdy: kitapda Palestinadan ýer satyn almak teklip edilýärdi. Jikme-jikliklere girip oturmaýyn...
Hehler bilen Teodor Gersl Angliýanyñ Wenadaky ilçihanasynda duşuşdy.
Gersl gündeliginde Hehler bilen nämüçin duşuşmak isländigini ýazypdyr.
Popyñ diñe iñlis korollygy bilen däl, nemes köşgi bilenem ýakyn gatnaşygy bardy, ol Badeniñ gersogy Fridrih I-iñ çagalaryny okadypdy, Wilgelm II bilenem dostlugy bardy...
Duşuşyklardan iki gün geçensoñ Hehler Gersli Fridrih I bilen tanyşdyrdy! Uly gersog Gersliñ we sionistik dawanyñ ömürlik goldawçysy boldy. Sionizmi goldamak üćin wezipesini we inisi nemes imperatory Wilgelm II-ni ulandy...
Hehler 1897-nji ýylyñ dowamynda pursat tapdygyndan çykyş edip ýa-da gyzyjlanan her ruhanysyna hat ýazyp Gersli hristian dünýäsine tanatdy.

* * *

1897-nji ýyl. Teodor Gersl Şweýsariýanyñ Bazel şährrinde Sionistleriñ birinji Bütindünýä gurultaýyny geçirdi.
Pop Hehler gurultaýa "ilkinji hristian sionist" hökmünde çagyryldy. Yzyndan...
Hehler Gersli Wilgelm II bilen duşuşdyrdy. Kaýzeriñ Stambulda Abdylhamyt II bilen duşuşmagynyñ öñüsyrasy!
Ikisiniñ kaýzeriñ üsti bilen eden sionostik talaplaryna patyşa garşy çykdy. Emma kaýzeriñ Ierusalimde bolanda halk köpçüliginiñ gözüniñ alnynda Gersl bilen elleşmeginiñ we sionist lagere baryp görmeginiñ fotosuratlary Günbataryñ habar beriş serişdelerinde çykansoñ, sionist hereketiñ legallaşmagy üpjün edildi...
Gersl 44 ýaşynda 1904-nji ýylda aradan çykdy. Soñky ýoluna ugradylanda ýakyn garyndaşlaryndan başga diñe Hehler bardy. Jöhitlerden aýlyk alan Hehler ölýänçä sionizme hyzmat etdi. Amerikan we iñlis sionistleri onuñ Londondaky mazarynyñ başyna ýadygärlik dikdi...
Häzir Hehleriñ arçan ýolundan millionlarça hristian ýöreýär:
Diñe hristian anglo-saksonlar däl, ýewangelist, metodist, baptist, presbiteriýan, kongregationalist ýaly mezhepler "Mesihiñ ikinji gelişi" ynanjyna eýerip, siionizme goldaw berýär.
Hem Netanýahunyñ el çarpyp garşy alynmagyny, hem Heniýäniñ garşysyna amala aşyrylan ganly terakty şu nukdaýnazardanam analiz edip görüñ.
Özem şu günlerde:
Nurjy-yşykçy neşirlerindäki "Hezreti Isa öldümi ýa ölmedi" makalalaryny-da şu nukdaýnazardan öwrenip görüñ: "Yslam sionizmi" döredilmek islenýär!

Soner ÝALÇYN.

"SÖZCÜ" gazeti, 02.08.2024 ý.