Gelin gelýär

GELIN GELÝÄR

Gelin gelýär.
Bar zat undulýar, diňe
Şowhun turýar, buýrup goýulan ýaly.
Gelin gelýär.
Ilat ýol berýär oňa,
Aýagnyň astyna ýazylýar haly.
Gelin gelýär,
Çaýçy çaýyn demleýär,
Wäşi aşpez gülüp, guşaýar bili.
Arman oňa hiç kim üns bermeýär,
Biri nogul seçýär,
Pul seçýär biri.

Gelin gelýär.
Her kim görmekçi bolýar,
Süýnýär, gysgalary salman ýadyna.
Birlige topulan bir açgöz, hernä
Ýetýär boýy kelteleňem dadyna.

Gelin gelýär,
Ýigit kämahal ýola
Ogryn garap, sanap otyr munduny.
Sallahlar gülüşýär: «Erkinlik bile
Hoşlaşmaly günüň ýyla döndümi?!..»

Gelin gelýär,
Diýmän dynjym alaýyn,
Gaýyn ene iki ýana ylgaýar.
Begenjiň,
Buýsanjyň baýdagy deýin
Başbogusy al-asmanda galgaýar.

Gelin gelýär,
Saýlanyp bar dost-ýardan
Näler çekjek welin toýuň şatysyn,
Otyr öýde, düşüp bilmän diwardan
Söweşde jan beren gaýyn atasam.

Otyr öýde,
Ýok, pelsepe gerek däl,
Toýda şagalaňa ýer bolsun diňe.
Seret, bütin oba aýdym-saz paýlap,
Gelin gelýär,
Ilat ýol berýär oňa.

Italmaz NURYÝEW.