Köşeşdir meni

KÖŞEŞDIR MENI

Köşeşdir sen meni!
P. Sepak.

Unut bar işiňi, unut sen bu gün,
Gel, otur gaşymda, daşa gitme sen.
Çözläýin, kalbymda galmasyn düwün,
Ýöne öte geçsem, gahar etme sen.
Gaýta, maňlaýymda goý-da eliňi,
Köşeşdir, ezizim, köşeşdir meni.

Durmuş-da, nämeler bolmaýar onda,
Käte bar islegiň çykýar tersine.
Asuda günleri gözlärdim men-de...
Arman, gohdan, aladadan, görsene,
Sypyp bilmän geçirýärin kä güni,
Köşeşdir, ezizim, köşeşdir meni.

Käte gowluk isläp äden ädimiň
Paşmaýar, üstüňe kirşenin seçýär.
Düýn egninden çeken käbir adamyň
Bu gün senden ýüzün sowýar-da geçýär.
Wah, nämüçin, ýatlaýarkam men muny,
Köşeşdir, ezizim, köşeşdir meni.

Bilýärin, özümem däl men perişde...
O bolsa kimedir bulap guýrugyn,
Geçdi-de, häkimlik satyp ýör işde
Hemem dynman ýagdyryp ýör buýrugyn...
...Gahar edip, otlamankam ýorgany,
Köşeşdir, ezizim, köşeşdir meni.

Şygyram görkezdi tomaşa baryn,
Kä ýygryldym, käte ganat gerdim men.
Seň bilen-geçmeli gijämiň ýaryn
Her gün birje bende bölüp berdim men.
Hasaba alma-da görlen görgüni,
Köşeşdir, ezizim, köşeşdir meni.

Dur!... Gapy. kakylýar!.. Gelen ýaz ýaly.
Şo bolsa gapyny aç, läläm, durman.
Çünki seň ýylgyrşyň hem oň jemaly
Meň teşne ýüregme dermandyr, derman.
Çekeýin baharyň hem seň näziňi,
Köşeşdir, ezizim, köşeşdir meni.

Italmaz NURYÝEW.