16:28 Külpetiñ dili ýok | |
|
KÜLPETIÑ DILI ÝOK
Publisistika
 Käbir gatlaklaryñ her ýyl endige öwrülen, öwrenşip giden temalary bar. Meselem, 6-7-nji sentýabr wakalary ýaly... Bu gatlaklarda bu hasratly waka hakda ýazmaýan, gürrüñ etmeýän ýok. Hatda romanlar ýazylýar, filmlerdir teleseriallar surata düşürilýär. Konferensiýalar, paneller geçirilýär. Şeýle-de: Barlyk salgydy («налог на богатство» или «налог на капитал») ýaly temalaram hökman her ýyl orta atylýar. Käbirleri türk halkyny garalaýanam, wagşy görkezýänem (psihologiki propoganda maksatly kampaniýa) bolsa, bular barada ýazylmagyna, pikir alyşylmagyna, hatda mawy ekrana çykarylmagyna-da hiç hili garşylygym ýok.  Emma... Bu meseläniñ gözden sypan ýene bir tarapyna siziñ ünsüñizi çekesim gelýär: Elimden geldigisaýy 6-7-nji sentýabr ýa-da "Barlyk salgydy" ýa-da "Ermeni genosidi" hakynda hakykatlary ýazjak bolýaryn. Emma: Şu ýyl şunuñ üstünde köp oýlandym: - Biz nämüçin diñe özümizi gorajak, aklajak bolup ýörüs? - Biz nämüçin diñe biziñ öñümize oklanan temalaryñ yzynda çyr-çytyr bolup ýörüs? 37 ýyllyk žurnalistlik karýeramda, makalalarymda, kitaplarymda ýene näçe gezek 6-7-nji sentýabr wakalary ýaly wakalaryñ üstünde durup geçmeli bolaryn? Hemişe "özgelere" edilenleri ýazyp ýörşüme, türkleriñ başyna inen gandöküşliklerdir gyrgynçylyklar barada nämüçin ýazmadymka? Bu meniñ gelen şahsy netijäm däl bolsa, eýse kim ýazdy? Hawa, Balkan ýurtlarynda, Kawkazda, Ýakyn Gündogarda türkleriñ duçar bolan zulumlary hakda kim näme ýazdy? Anyklap bolan maglumatlara görä, 1683-1922-nji ýyllar aralygynda 5.5 million türk diñe aslynyñ türki gelip çykyşlydygy sebäpli öldürildi. Bu ajy hakykat okuw kitaplarynda-da agzalmaýar-a! Nämüçin?  * * * Rumyniýadaky Gazykly Woewoda, Wengriýadaky Budin, Müsürdäki Gala ýaly ir wagtlar bolan gyrgynçylyklar barada agzajagam bolman, has ýakyn taryha geleýin. Meselem: Günbatar 1821-nji ýylda grekleriñ gazanan garaşsyzlygy hakda zol odalar düzýär, emma Nawarin, Monemwasiýa, Tripolis, Agrinion gyrgynçylyklarynda bandalaryñ 20 müñ türki öldürendiklerini ýazmaýar! A Krit? Iki müñ türküñ öldürilen Lassiti, Kisamos, Sitýa gyrgynçylary barada bilýän barmy? A Harmanly, Issowa, Kiçewo, Plasnisa, Edeköý ýaly ýerlerde bolgar bandalarynyñ eden gyrgynçylyklary? Öýler ýakyldy, talandy, bäş müñe golaý türk öldürildi... A Anadoly? Antep, Maraş, Ýalowa, Urfa, Birejik ýaly gyrgynçylyklar? Ermeni "genosidi" hakda ýañrap ýörenler diñe Wanda ermeni bandalaryñ 1915-nji ýylda 6 müñ türki öldürendigini, öýleri talandygyny ýazmaýar. A beýleki gyrgynçylyklary näme?  Iñlisleriñ oýnatgysyna öwrülen feskaly alymsumagymyz "käşgä, grekler ýeñiş gazanan bolsa bolmaýadymy!.." diýende, ýeke gezegem Izmir, Uşak, Salihli, Manisa, Turgutly gyrgynçylyklaryny agzap bilmedi. Diñe Alaşebirde grekleriñ üç müñ adamyñ ganyna galandygyny, aýal-gyzlary zorlandygyny aýtmaýar... Türklere garşy Kerkukdan Kipre çenli bolup geçen gyrgynçylyklaryñ haýsysyny ýazaýyn? Kipre gidip-gelýänleriñ näçesi "Warwarlyk muzeýine baryp gördükä? Sürgünler barada-ha agzajagam däl... Taryhymyzdaky gyrgynçylary nämüçin bilemzok? Hawa, nämüçin bular barada hiç zat ýazamzok?  * * * Halkyñ başyna düşen külpetleri deñeşdiresim gelenok... "Türkler bir million ermenini, 40 müñ kürti kerçedi" diýibem, Günbatardan baýrakdyr öwgi aljak bolýan çemeçilligimem ýok! Çözmek isleýän zadym türküñ külpet bilen synagy! Biz türklere - özümize edilen gyrgynçylyklary nämüçin hiç agzamzok, ýazamzok? Şuny pikir etdim: Biz duçar bolan hasratlarymyzy, gören görgülerimizi ýatdan çykaraññaç! Hristian medeniýeti bolsa, meselem, haçdaky çekilen yzany, külpeti mahabatlandyrmaga meýilli... Biz şonuñ üçin öz çeken külpetlerimiz bilen däl-de, "özgeleriñ" başdan geçirmeleri bilen gyzyklanýarys. Biz çeken külpetlerimizi palasyñ aşagyna süpürip bukmagyñ gaýgysynda... Biz çeken külpetlerimiziñ ýyl dolanşygyny-da ýatlamak islemeýäris...  Biz külpetiñ öñünde (ýazgyda kaýyllykdanam, feodalizmiñ galyndylaryny aşyp bilmezlikdenem) sesimizi çykarman agraslyk bilen durýarys. Birem biziñ "ýokardan seretme" gylygymyz bar: "grek, bolgar, ermeni, arap kimmiş, olary türkleri gyrypdyr diýip beýgelder ýaly!" Psihologiki propogandasyny-da edemzok. Döwlet 1988-nji ýylda Behmenin Mezrasynda sekizi çaga, ikisi aýal 11 raýatymyzy öldürende bolşy ýaly, PKK-niñ nijeme gandöküşligini "bäş-üç sany çapawulyñ adyny agzanyña degenok" diýip ýatlamagam islänok... Biziñ medeniýetimizde külpetiñ dili ýok... Soner ÝALÇYN. "SÖZCÜ" gazeti, 14.09.2023 ý. | |
|
| |
| Teswirleriň ählisi: 1 | ||
| ||
0
