Yhlas

Yhlas

Saçlarymy elim bilen daraklap,
Öýkenime sorýan şäher howasyn.
Günleriň öňünde özümi aklap,
Ýaşap ýörün ömrüň galan dowamyn.

Ylham ýüregime joş beren çagy,
Başym ýene asman kibi çalarar.
Şygryň humaryna aldyryp aňy,
Sizi ünsden düşürdimmi çagalam?!

Bu ömri eklenje berip, onsuzam
Tutdum men günleriň ýyrtyk ýakasyn.
... Şygyrlarym ýazylmaz men bolmasam,
Hem çagalam oňup bilmez kakasyz.

Durmuşda kem etmän joşgun-hyrujym,
Ähli dert-gaýgyny işläp ýeňýärin.
Gelinler dişlese gyňajyň ujun,
A men öz syrymy "dişläp" gelýärin.

Barybir, setirlem syrym paş eder,
Bilýän, munda sözleň ömre deňligin.
Belki şu günlere çenli ýaşadan
Yhlasym görkezer meniň kimligim...

Goçmyrat Orazberdiýew