Ýatkeşlik

ÝATKEŞLIK

Gözleň reňki sähel ýadyma düşýär,
Birmahallar maňa ýylgyryp bakan.
Surat deý gözümiň öňünde üýşýär,
Men seni unudyp başardymmykam?!

Ýadymda, kirpikleň - guşlaň ganaty,
Ýylgyryşyň süýnüp giden ýyldyrym.
Gözleriňden uçgun syçran halaty,
Alawny öçürip bilmez ýyllaram.

Emma aramyza düşdi sowuklyk,
Indi ol günleri dolap bilmerin.
Biz söýginiň gapysyndan kowuldyk,
Sen nirede, men nirede dilberim?!

Ýyllar hakydama kerebin gurmuş,
Dörjeleseň şindem ýüregim otdur,
...Ýatkeşlikden mahrum etse-de durmuş,
Seni welin aýryp bilmedi ýatdan.

Goçmyrat ORAZBERDIÝEW.