"Bu sapar arzuwlarymyzda duşuşaly..."

"BU SAPAR ARZUWLARYMYZDA DUŞUŞALY..."

Şu sapar duşuşygymyzy arzuwlarymyzda geçireli, arzuw eden ýerimizde çaý içeli, biri-birimize içimizi dökeli. Hakykat bilen bu arzuwlarymyzy köýdürmäli. Diňe ikimiz bolup bilmejek zatlar hakda sözleşeli. Hiç kimiň gaýgysy bilen däl-de, diňe öz gaýgylarymyzy gürleşeli. Men başgalar üçin hasrat çekip ýadadym, örän ýadadym... Adam üýtgeşik eken, hemme zada düşünýändirin öýdýär, ýöne käwagt özüne-de düşünenok. Eger-de adamda ýalňyşlaryny hemem dogry hereketlerini terezide çekmek mümkinçiligi bar bolsady, elbetde, ýalňyşlyklar tarapy agyr geler. Dünýädäki hemme kişä adam diýsegem, olar biri-birine meňzeş däl. Olaryň hersi aýratyn bir dünýä. Ýöne her adam üçin durmuş ajaýypdyr. Adam başgalar hakda pikir edip, hemişe özüni unudýar. Başgalaryň göwnüne degmejek bolup, öz göwnüne ýüz gezek degýär. Durmuşda biriniň göwnüne degmekden hemişe ejap edipdim. Başgalaryň gaýgylaryny alada edip, öz gaýgylarymy gizläpdim, hiç kime aýtmandym, aýtsamam, juda az adama aýdypdym, geçip gider öýdüpdim. Emma geçenok eken... Belki, sen ýanymda bolsadyň, bu gaýgylaram bolmazdy, asla-da bu zatlaryň hijisem bolmazdy. Hemme zatdan beter, hemme kişiden beter seni göresim geldi. Bu sapar arzuwlarymyzda duşuşaly, dostum...

Sapa HOMMADOW.