DÜÝŞ
Säheriň çagynda,çal duman içre,
Sumat boldy gije gören düýşlerim.
Gökde bir zadyň-a geňeşin edýär,
Ap-akja bulutlar gurap üýşmeleň.
Düýşde ýanyňyzda gördüm özümi,
Menem siziň bilen çaga deýmişim.
Bile Tom Soýeri okadyk öýdýän,
Hekaýatyn diňledik soň derwüşiň.
Oýunjak kerpiçden jaý gurduk soňra,
Köňül içre bina bolan köşkdi ol.
Ylgamaňam kemini-hä goýmadyk,
Bir ýerlerde sazyň sesin eşdibem.
"Japbaklarym geliň hany,ýanyma"
diýip ataňyzam barmyşyn öýdýän.
Eneňiz:"Ajygan bolaýmaň" diýip,
Süýtli aş bişirip ýörmüşin öýdýän.
Kakaňyz çagyrdy mellege sary,
Bile tohum sepişdik biz pellere,
Soňra garynjalaň kerwenin görüp,
Özümizçe otardyk biz pelsepe.
...Sagadyň sesine oýanypdyryn,
Säher çig süýt kimin gaýmak tutupdyr.
Sizi juda küýsäp oýansam düýşden,
Köp şükür,jaň etsem sesim ýetip dur.
Ýolda goýan bolsam didelerňizi,
Balalarym,ejeňizi bagyşlaň!
Nesip bolsa,hökman bararyn,ýöne
Bu hepde-de ýene maňa garaşmaň!
Meñli AŞYROWA.