Ýekelik

ÝEKELIK

Gitdiň - ýeller gowşady,
Sus aýlandy harazlar.
Gün Ýeri giç ogşady,
Gygyrmady horazlar.

Bilmän - ýolum ýitirdim -
Nirä uzanlygyna.
Men şu gün göz ýetirdim
Ömrüň uzynlygyna.

Geň galma sen, ezizim,
Meniň beýle dymýanym.
Göz ýetirdim men şu gün
Darlygyna dünýäniň.

Gijeler gözlerime
Ýyldyz ýolunyp gaçan.
Çaň ýagdy sözlerime,
Haçan gelersiň,
Haçan?!

Kül - közde, gaş - gözüňki,
Bar zat öňki ekeni.
Öz öýüm däl özümki,
Öýüm - seňki ekeni.

Torum ÝAÝLAN-BATAŞY.