■ MUHAMMET
Jebeli –Nurda gowuşan,
Paýyň gurban, Muhammet.
Kapyrlar bilen döwüşen,
Aýyň gurbam, Muhammet.
Diliňde Hakyň dogasy,
Köňül içre iman sowaly,
Demiňde jennet owazy,
Halyňa gurban, Muhammet.
Ösmezden hazan şemaly,
Sargardyp kaddy-jemaly,
Gazan diýp nury-imany,
Zaryňa gurban, Muhammet.
Ymmat eýleýip älemi,
Haka baglaýyp täleýi,
Kyblagäh kylyp Käbeýi,
Jaýyňa gurban,Muhammet.
Dirisiň ymmat içinde,
Dirisiň jennet içinde,
Hak bilen söhbet açanda,
Janyň gurban, Muhammet.
4.4.1994.
■ MEDINEDE
Iki jahanyň serweri,
Medinede, Medinede.
Beýik Allanyň dilberi,
Medinede, Medinede.
Hakyň ýolun gymmat eýlän,
Binyýazdan ymmat eýlän,
Ahyrýeti jennet eýlän,
Mdinede, Medinede.
Ynjan- gözleriniň zary,
Ynsan buýsanjy, ygrary,
Ynsap- namys bilen ary,
Medinede, Medinede.
Zar ýetmez çeken zaryna,
Dag ýetmez çykan dagyna,
Zalymy çeken daryna—
Medinede,Medinede.
Başym dolanmyş donuna,
Didämi goýdum tozuna,
Janym jaýladym ýoluna,
Medinede, Medinede.
06.04.1994.
■ ŞADYR RESULALLA
Külli älewm içre, şadyr Resul alla.
Külli ummatyň adyňa, zardyr Resulalla.
Beýik Taňrynyň söýeni, ýüzi nury-röwşen,
Nury didäm içinde bardyr, Resulalla.
Sen mömine hyrydar, mömin seniň zaryňda,
Gije-gündiz köňlüme ýardyr Resulalla.
Birje girde düýşime, otur meniň ýanymda,
Didara hedýe kylyp, dadyr ,Resulalla.
Müň mertebe alkyşym, beýik taňrym, adyňa.
Ummatyma keremiň- şadyr, Resulalla.
Iki jahan guwanjym,hem bu ýeriň üstünde,
Göz özgäni görmez, dil-laldyr, Resulalla.
Tozuň gözüme sürtdüm, batyl gözlem açyldy,
Görmek-iman, galany, haldyr, Resul alla.
Ismiň dilime ýapdym, dilimden dürler saçdym,
Jaýyň jennet eýleýir-şandyr, Resulalla.
Iki dünýäm çyragy, şadyr, Resulalla.
Külli ummat adyňa, zardyr, Resulalla.
06.04.1994.
■ ALLA JAN
Käbäň içre gowşur meni didar,
Dileglermi kabul eýle, Alla jan.
Bu topraga sürtsem iki didämi,
Dileglermi kabul eýle, Alla jan.
Resulalla-Muhammediň haky üçin,
Çaryýarlaň, päk ummatyň haky üçin,
Röwşen nuryň, dokuz jennet haky üçin,
Dileglermi kabul eýle, Alla jan.
Iman içre ýalka alty atamy,
Ýedi enewm ötsaün külli hatamy,
Säher:“Hak, ýalka“ diýp tutdym ýakamy,
Dileglermi kabul eýle, Alla jan.
Ölüm hedýäň bolar şah-u-gedaga,
Imanlylar gowşar Haka-Hudaga,
Hany-manym-başym saňa sasdaka,
Dileglermi kabul eýle, Alla jan.
Enemi ynjytsam dowzahyň jaýym,
Pederi ynjytsam, otda lowlaýyn,
Hem Muhammet ymmatyndan bolmaýyn,
Dileglermi kabul eýle, Alla jan.
Ýetimi agladyp, iýmedim aşyn,
Mükmin- musulmana gurban bu başym,
Atam-Adam, Hyzyr-Ylýas gardaşym,
Dileglermi kabul eýle, Alla jan.
Ýalka Taňrym, Muhammediň ummatyn,
Il-gün, dogan-gardaş saklap hormatyn,
Ýagşylyk ýaşasyn, haram bolmasyn,
Dileglermi kabul eýle, Alla jan.
03.06.1992. Mekge. Käbe.
■ SENIÑ DOGULAN GÜNÜÑ
Seniň dogulan günüň,
Üljeler güle çümmüş.
Böwsüp gaflartyň tümün,
Älem nura düşünmiş.
Ölmez Hak, dogulmaz Hak,
Getirende äleme,
Bilbiller urup kah-kah,
Köze dönmüş läläler.
Dünýe bakmyş ynjana,
Pälinden gaýtmyş zulum,
Hakdan hedýe ynsana,
Seniň dogulan günüň,
Seniň dogulan günüň.
Abraý sen bu ýalançyda,
Haýhat gün-iman, hümmet,
Her göwne sönmez çyra,
Ýa, Muhammet, Muhammet!
Seniň doglan günüň,
Seniň dogulan günüň,
Seniň dogulan günüň.
07.5.1994.
■ ÝÜZ ÝYLLAP ZALYM GOLUNDA
Ýüz ýyllap zalym golunda,
Ilimi aldylar meniň.
Gan eňredip Hak ýolunda,
Dinimi aldylar meniň.
Öt günämi Hak-Resul,
Ömrüm ötdi heder bilen,
Ýüz ýyl bäri dilim bagly,
Sözleşmek ýok Peder bilen.
Yhlas etdim, bary ýalan,
Dil, dinim, dessan galmady.
Hoja Ahmedi arzuwlap,
Külli Türküstan galmady.
Şükür, Taňrym,
Eredi buzy daglaryň.
Diňle, Resul, nagmalarym,
Şanyňa dessan bagladym.
Gözde nurum, eziz Hakan,
Gora Resulyň ymmatyn.
Indi şo-ol hasraty-hazan,
Başa inmesin, inmesin.
8.4.1994.
■ MEKGE-MEDINE ILINDE
Ýüzüňde nuruň aňladym,
Mekge-Medine ilinde.
Haka sygyndym, agladym,
Mekge - Medine ilinde.
GördümHyradagy gördüm,
Didelerme sürtdim gerdin,
Süňňümden sabady derdim,
Mekge- Medine ilinde.
Diýdim: „Bolaýyn gurbanyň,
Duýdum:“ Jepbaryň permanyn,
Degmiş ruhy Gurhanyň“,
Mekge-Medine ilinde.
Zaryňda külli ymmaty,
Ýanynda Byragy-aty,
Älem bolup Resul ýatyr,
Mekge-Medine ilinde.
Resul, demiňi aňladym,
Mekge-Medine ilinde.
Haka sygynyp agladym,
Mekge- Medine ilinde.
09.04.1994.
■ NAMAZ IÇINDE
Arzym eşitgil, Muhammet,
Bozulmyş zaman içinde
Är kişiden gaçmyş summat,
Deň bolmuş zenan içinde.
Nijeler galmyş näletde,
Lebiz akmyş täheretde,
Heniz dogmadyk bäbekler,
Jeň gyrmuş enäň içinde.
Gazap-ar çykmyş asmana,
Nebis höküm gurmuş jana,
Indi bu gözel jahana,
Dem urmuş günäň içinde.
Gardaşlar doýmuş gardaşdan,
Ýaz örtenmiş gara gyşdan,
Hak senasyn sözlän guşlar,
Ah urmuş owaz içinde.
Beýdip gitse, Haka barýan,
Ýol gömüler, ömür-girýan,
Iman, yhsan çekmiş arman,
Delmurup güman içinde.
Eý, Resul, dili dogaly,
Hak alynda çekip zary,
Biz üçin dile sogaby,
Bäş wagt namaz içinde.
8.4.1994.
■ BASYM ÝERIÑ ÝÜZI MUSULMAN BOLAR...
Eý, Muhammet, ýalançyda, o çynda,
Sensiz öten ömrüm hazana dönsün.
Ötlem-ötlem haýýatlaryň içinde,
Sen şindem“Alla!“ diýp, söweşip ýörsüň.
Saňa umyt baglap päklenýär ynsan,
Haka uýup, ýüki ýeňleýär dünýäň,
Şypa tapýar senden horlanan ,ynjan,
Şeýdip, her gün, her bir göwünde ýeňýäň.
Gün-günden ornaýaň älem göwnüne,
Dünýe indi din-u-sözüňe gurban.
Bar köňlüň yhlasy sen, sen, diňe sen,
Älem ymmatyňa öwrülip barýar.
Eý, ýüzi nur, Allaň söýen dilberi,
Ýürek aglar, gözler sen diýp gan bolar,
Söweş, ýeň, tämizle älem illeri,
Basym, Ýeriň ýüzi musulman bolar.
10.4.1994.
■ HALKYM
Bu gün döwlet guşy başyňa gondy,
Hakyň rehnet nury salyp dur ýalkym,
Yrsgal çeşmäň gözi ýaňy oýandy,
Sabr eýle, sabr eýle, sabr eýle, halkym.
Ýurt, watan özüňki, synmaz erk elde,
Göze sürme eýläp onuň her harpyn.
Işle, gazan, baýa, toýlar tut, hem-de,
Sabr eýle, sabr eýle, sabr eýle halkym.
„Häh“ diýseň, „Mäh“ bolup gurlanok jennet,
Dyrnaklaryň bilen gaýalar gazap,
Bir jana öwürlip ähli halk, millet,
Il bolup çekmeli abyrsyz azap,
Şonda gum diýeniň bolýandyr altyn,
Sabr eýle, sabr eýle, sabr eýle, halkym.
Beýik türkmen, adyň arşa göteren,
Geljegyň ak ýolun, arma, gur, galkyn,
Hem parlak erteleň hatyrasyna,
Sabr eýle, sabr eýle, sabr eýle, halkym.
1.6.1995.
Öwezdurdy NEPESOW.
