"Meniň boluşlam täsin..."

"MENIŇ BOLUŞLAM TÄSIN..."

Meniň boluşlam täsin,
Ýa gudrat bar mende-de.
Lebap ilinde özüm,
A men bolsa Pendide.

Sowuk düşdi mazaly,
Howa doňdy howada.
Ýolka jäjegi ýaly,
Mähirsiz Gün howala.

Gaz oduna çoýunyp,
Daşa bakýan aýnadan.
Ol ýerde gyçak sowuk,
Hiç parhy ýok taýgadan.

Öýdäkiler neneňkä,
Onda gaz ýok ýakmaga.
Körpe inim paltaly,
Çykar odun çapmaga.

Böküp dur-da doň ýylgyn,
Gyýtagrak uraý, inim.
Gulak-burnuň gyp-gyzyl,
Ygyrak duraý, inim.

Ot çekýändir mallara,
Gelin ýaryk haltada.
Üşärsiň-ä, ylgaý-how,
Haýalrak-da, ýalta däl.

Uýam geler işinden:
“Sübse nirde, pil nirde,
Şeýdip ýatjagyn bilsem,
Syryp giderdim irden.”

Daş çykar bir gyzjagaz,
Emedekläp işikden.
Ejem tiz garbap alar,
Men gynanyp ýetişmen.

Bir elinde gyzjagaz,
Atjak bor pejiň külün.
Pişik çolaşyp ýykar:
“Al çagany, al, gelin.”

“Ylga, gelin, ýet, gelin”,
Men ýeňsämi gaşaýan.
Lebapda sowuk welin,
Men Pendide üşeýän.

Baýram AKATOW

19.01.1997.Çärjew.