Garadrin / satiriki hekaýa

GARADRIN

Biz etrabymyzyñ "Täze ýol" daýhan birleşiginiñ hasapçysy Berdi Garaýew bilen gysgaça, emma döwletli gürrüñ etdik. Aşakda şol gürrüñiñ stenografik ýazgysyny okap görüñ:
- Berdi, sen ýaş başyñdan daýhanlaryñ daban azabyna degişli pullary öz kisäñe urmagy, umuman, mugt iýmegi kimden öwrendiñ?
- Gowaca düşýän garadrin diýen gurçukdan öwrendim. Şol meniñ halypam hem mugallymym.
- Düşnükli.
- Düşnükli bolman bökerem.
- Berdi, seniñ ýazan galp tabeliñe 5-nji daýhan hojalygyñ brigadiri Kuly Myradow, daýhan birleşigiñ baş buhgalteri Keýik Begliýewa, baş ykdysatçy Ýazym Italmazow dagy nädip gol çekýärler?
- Gözlerini pugta ýumup.
- Gaty düşnükli.
- Düşnükli bolman oýnaram.
- Ýumrugy ýekedaban ýaly daýhanlara aýda 25 manat, a işlemän ýatan näzik, çepiksijelerem 180 manat gazanýarlar. Sebäbi näme?
- Dogan-garyndaşa, tanşa, dost-ýara sarpa goýýas.
- Jogaby nagt etdiñ.
- Bizde gümmi-sümmi bolmaz.
- Oguljahan diýen birine aýda 190 manat ýazypsyñ. Bu kim?
- Brigadiriñ aýaly. Munuñ özi işe çykanok. 5-nji klasda okaýam gyzy Näzik oña derek işleýär. Näzige-de hak ýazýan. Ony siz görmediñiz.
- Aýjahan diýlen birine 180 manat ýazypsyñ. Bu kim?
- Ol meniñ öz enem haw. Onuñ ýerine Ejegûl diýen gyz jigim işleýär. 7-nji klasda okaýar. Ejegüle-de hak ýazýan. Ony siz añmadyñyz.
- Ogulsenem diýen birine 240 manat ýazypsyñ. Bu kim?
- Ol meniñ hut öz aýalym ahyry. Ýazman bökersiñem.
- Işe çykýamy?
- Oña derek özüm çykýan. Ýazyna ýorunja suw tutýar, gyşyna ders çekýär diýip ýazýan.
- 190 manat ýazylan Bike Nazarowa seniñ nämäñ?
- Aýal doganym. Durmuşa çykan.
- Çaga dogrulýan öýde ýatyrka-da işledi diýip hak ýazypsyñ-la oña?!
- Jan ýaly, süýtdeş doganyñ bolsa senem ýazarsyñ.
- 140-luk Bibi Haýdarowa kim?
- "Gadyr gaýyn bilen giýewde" diýlen sözi eşitmänmidiñiz?!
- Gudañmy?!
- Bardyñ üstünden.
- Geldi Garaýew diýilýän oglanyñ obadan 160 kilometr uzaklykda işleýän kakañ ýanynda bolýandygyny eşitdik. Oña aýda 180 manat bikanun hak ýazypsyñ-la!
- Elimden gelýä.
- Kakañ Gara Ahmedow hem öz ogly Geldä balçy diýip, aýda 190 manat hak ýazypdyr ahyry.
- "Bal tutan barmagyny ýalar" diýlen söz bar-a.
- Söz başga, kanun aýry.
- Biziñ-ä kanunymyz şeýle. Ony az görseñiz 4-nji klasda okaýan inim Jepbar Garaýewe 180 manat ýazyp ýörün. Görübilmedigiñ gözi çyksyn, ýamanlar ýarylyp ölsün.
- Bu ýerde birküç sany işgäre, Oguldöndä, Bahara, Agamämmede aýda 140-160 manatdan basypsyñ-la?!
- Olar menden ýalbaryp almaýarlar. Gözüñe basyp alýarlar. Olar brigadirimiziñ çagalary ahyry. Ýogsam olary külembikesinde pyrlap biljek daýaw daýhanlara aýda 30-40 manady zordan nalaç ýazýas.
- Diýmek, siziñ daýhan birleşigiñizde galplyk, garyndaşlyk ýetjek derejesine ýetipdir-dä?!
- Ýokardan tanapymyzy dartýançalar entegem gideris.

Gurbangylyç HYDYROW.