Keýmir kör

KEÝMIR KÖR

Türkmen halkynyň bu, söýgüli gahrymanynyň hakyky adyna, durmuş ýoly baradaky maglumata taryh sahypalarynda henize çenli duş gelnenok.

Çetindir taryhyň gaňysyn açmak,
Oňa girip bolmaz jandaňam geçip.
Emma bu söýgüli gahryman üçin
Taryhyň gapysy açykdyr-açyk:

Islese adyny altyn-zer bilen,
Polat bilen ýazdyrybam bilerdi
Arman, onuň aladasy başgady,
Başgady oň çekýän hupbaty-derdi.

Ýagy dökülip dur dumly-duşundan,
Kepdirenbk türkmenleriň gözýaşyn.
Göreşmäge bolsa güýç-gaýrat gerek.
Aňsat däl jemlemek ilatyň başyn.

Her tiräň öz hany, öz ýaşulysy bar.
Her hanyň, ýaşulyň bar öz permany.
Ýöne bütin halkyň göwnünden turjak
Tapmak kyn akylly-başly bir hany.

Ýekäň çaňy çykmaz... Batyr ýigitler
Urunýar, kösenýär– hersi bir, ýerde.
Depelenýär halkyň namysy – ary,
Ine şu agyr dert bardy Keýmirde.

Ine şu agyr dert ýolgany üçin,
Duşmanlar ätiýaç ederdi ondan.
Ak ýürekli adamlaryň içinde.
Barýardy şöhraty artyp gün-günden.

Ak ýürekli adamlara ol mydam
Bagyşlady paýhasyny, ýüregin.
Ili gereklese.
Ili idese.
Taşlap gitdi elindäki çöregni.

Göreşdi ol akyl bilen, aň bilen,
Pikiri duşmana ok bolup uçdy.
Jeň gününde nökerlere baş bolup,
Gylyç bilen, hyrly bilen göreşdi.

Göreşdi...
Bir günem...
Onuň weseti
Geçdi hakykata...
Nädersiň ýeri!
Duşman müň ölenni duýmasyn diýlip,
Tekizlendi Keýmir körüň mazary.

Tekizlendi...
Hawa, ölenden soňam
Duşman heder etdi oňuň adyndan,
...Bu batyr ýigdini, gahrymanyny
Halkym ömür çykarmady ýadyndan.

Ýaşatdy namysy, wyždany bilen,
Gurdy ýüreginde beýik ýadygär...
Bäri gel,
gadyrdan,
Taryhçy alym,
Indi bolsa seniň bilen gürrüň bar.

Gürrüň bar...
Agtar sen,
agtar baryny
Taryha degişli dokumentleriň,
Dogry, seň özüňem bilýänsiň kemsiz,
Oňa mätäçligi ýokdur Keýmiriň.

Onsuzam ol ýüreklerde ýaşaýar,
Ýüreklerde oň ýüregi urup dur.
Emma Keýmir ýaly gerçekleň ady
Taryh üçin welin zerurdyr, zerur.

Zerurdyr...
Müň tüýsli lybas geýse-de,
Onuň ornun tutup bilmez başgalar.
Agtar sen,
ýogsa-da goja taryhyň
Bir mukaddes sahypasy boş galar.

Italmaz NURYÝEW.