“Mini Futurisme” kysymly kyssajyklar - Çakylyk

ÇAKYLYK

Kosmos giňişligine habar ýollap, başga saýýaralarda mekan tutan siwilizasiýalar bilen aragatnaşygy ýola goýmaga niýetlenen äpet enjam, pylança ýyldan soň gurlup gutaryldy.
Şonuň dabaraly açylyşynda-da goja alym söz sözledi:
-...Bu enjam, adamzadyň röwşen geljegine tarap mähir-muhabbetden doly çakylygy – tükeniksiz älem giňişliginde birek-birekden bihabar ýaşaýan paýhaslylara birigmäge bolan teklibi ýollar! Şeýdibem Älemiň ähli paýhaslylarynyň agzybirleşmegine, bütewileşmegine tarap ilkinji – esasy ädim ädiler...
...Sözüni soňlan badyna ol, dabara bilen enjamyň gyzyl düwmesine dürtdi. Demirden tenine hüňňüldäp jan giren enjam, biraz salym geçirip, tüm-garaňky, mährewsiz kosmosyň jümmüşine garşy tutuş adamzadyň adyndan dostluga, agzybirlige, mähirli gatnaşyga bolan çakylygy iberdi...
...Birnäçe wagtdan soň, Zemin saýýarasyndanam, Gün sistemasyndanam millionlarça parsek daşlykda, şol çakylygy insektoid jynsly paýhaslylaň hüjüm ediji flotunyň aňtawçy gämisiniň antennasy gapyp aldy...