“Mini Futurisme” kysymly kyssajyklar - Idilliýa

IDILLIÝA

...Şildirdäp akýan durnagöz çeşmäň kenarynda, iki sany basdaş oglanjyk ýap-ýaşyl otuň üstünde pel-pelleýän akly-gyzylly kebelekleri kowalaýar. Tosunja, tokgaja, akja, mele gulpak gyzjagazam ýaňy ýöremäni öwrenen pökgüje, ýalaňaçja aýaklaryna çolaşyp, olaň yzyndan galmajak bolýar. Loňkuldap ýykylsa-da, aglamaň deregine jykyr-jykyr gülýär.
Ýeňiljek, gyrmyzy köýnekli, şojagaz gyzjagaza meňzäp duran görmegeý gelnem, olary mähir bilen synlap, mangalda çişlik bişirýän ärine gysmyljyraýar.
Közde jyzyrdaýan kebabyň ysy, çeşmeden göterilýän akar suwuňdyr, ýere ýorgan bolan otlaryň-gülleriň, şemala ygşyldaýan baglaryň ysyna gatylyp-garylyp şähdiňem açýar, işdäňem...
-Siziň bu günki idilliýa limitiňiziň dolandygyny, şäheriň emeli intellekti – on bäş ji ýedi ýedi ýedi zero zero kyrk sekiz a epsilon omega habar berýär, raýat on ýedi milliard sekiz ýüzünji! Siz wirtual giňişlikden çykyp bilersiňiz!
Gulagynda-da däl-de, hut beýnisiniň merkezinde bu ýakymsyz, mehaniki ses ýaňlanyp başlan badyna, wirt-kürsüde (awt. wirtuallyk kürsüsinde) oturanyň gözüniň öňünden çeşmede, serçemenligem, onda ýaýnaýan balajyklaram, görmegeý gelnem gaýyp boldy.
Ol kynlyk bilen gözüni açdy-da, ýerinden dikelmäge mejaly bolman, töweregine göz aýlady.
Gurşundan guýlana çalymdaş ýylmanak, çalymtyk diwar...
Özi ýaly önelgelilik üçin zerur mukdarda ball toplamaga gurby çatmaýan garamaňlaý emelsizleň oturan kürsüleriniň sansyz hatary...
Alagaraňkylyk...