Puşkin

PUŞKIN

Gije, gara şalyn düýrläp iñ soñy
Gizlenipdi güne gözi düşende...
Ýaz güneşi uçganaklap ýap-ýañy
Garagumdan asman sary süýşende,
Köçämiziñ görki kölgeli bagda,
Seýil edip gezýärdim men şol çagda.

Günüñ altyn naýzalary gezelip,
Ýaşyl ýapraklardan parran geçýärdi.
Gyrmyzy gül owsun atyp, bezenip,
Bilbiliñ nalasy barha göçýärdi.
Gör, ne gözel Aşgabadyñ baglary!..
Biderek sarp etmän altyn çaglary,

Gurujylar işine baş goşupdy,
Hereketde gaýnaýardy köçeler.
Byçgy, çekiç, zawod, fabrik joşupdy,
Juwan dek saýýardy özün gojalar.
Oýan-buýan gezim edip dolandym...
Emma seýle çykan ýeke men däldim.

Bag içinde, egmän belent başyny,
Demirgazga garap durdy bir göwre.
Gymyldatman ötgür gözün, gaşyny,
Göýä syn edýärdi ol biziñ döwre.
Üýtgeşikdi onuñ dünýä garaýşy,
Üýtgeşikdi asyl onuñ döreýşi.

Şeýle bir güýç bardy onuñ keşbinde:
Geçenleri çekýärdi ol özüne.
Diñe Russiýada däl ol ýa finde,
Mälimdi ol asyl dünýä ýüzünde.
Goñşymdy ol, her gün ony görýärdim,
Her gün hormat bilen salam berýärdim.

Döredipdi ony beýik rus halky,
Olam guwanjydy halkyñ aç-açan.
Rus halkyny şonuñ deýin hem, belki
Meşhur eden däldir hiç kim, hiç haçan.
Rus halkyny göterenleñ biridir,
Ol göwre öli däl, mydam diridir.

Göwnüm tukat bolsa, galam daýansa,
Şow almasa baş goşamda bir işe,
Ýa kalbymda bir täzelik oýansa,
Onuñ bilen sözleşýärin hemişe.
Ussadym hem dostum göwnüm göterýär,
Goltugymdan gop berýär-de atarýar.

Borjum ödäp, çekip derrew aýagy,
Gol gowşuryp durdum onuñ gaşynda.
Hakyky ynsana hormat maýagy,
Göýa parlap ýanyp dur oñ başynda.
Gözüm düşüp şol salymyñ özünde,
Okadym men ýadygäriñ ýüzünde:

''Ýeter meniñ dabaram beýik Rus iline,
Adym tutar hemme dil, şondaky bar halk-da...''
ㅡ Beýik ussat, sen bu gün düşdüñ jahan diline,
Saña hormat goýulýar, gürrüñ gidýär sen hakda.

Ýadyñdamy, sürgündediñ hemişe!
Samoder£awiýa seni ezýärdi!
Baş goşañda hemme ýerde, her işe,
£andarmalar kölge bolup gezýärdi.
Şonda-da sen belent başyñ egmediñ,
Dür saçýan diliñi asla ýygmadyñ.

Şygryýetiñ gadyryn bilýän adamdyñ,
Iñ söýgüli dostlaryndan birisiñ.
Söweşe gidende, gyzdyryp demiñ,
Goltugyndan gop berýän bir dirisiñ.
Çakyşdyryp seniñ bilen toýda-da,
Seni ýatlap içýändiris öýde-de.

Seniñ ölmez, sönmez beýik zähmetiñ,
Ýetdi bütin Ýer ýüzüniñ halkyna.
Altyndan agdygrak dürdäne hatyñ
Bezeg berýär ildeşleriñ mülküne.
Seniñ adyñ agyzlarda yramdyr,
Seniñ şygryñ hassa jana aramdyr.

Okasak-da, oýnasak-da, gülsek-de,
Işlesek, döretsek, ursak-da gadam,
Beýik döwrümizden lezzet alsak-da,
Ýanymyzda ýoldaşsyñ sen elmydam.
Sen gözel durmuşyñ tarapdarysyñ,
Parahatlyk isleýänleñ ýarysyñ.

Bu gün Aşgabadyñ operasynda
''Onegin'' ýañlanýar türkmen dilinde.
Asyl her bir şygryñ il arasynda
Okalýar, añlanýar türkmen ilinde.
Seniñ heñiñ çalýar gyjak hem dutar,
Meniñ neslim saña baky minnetdar.

Seniñ keşbiñ haly bilen bezedi
Biziñ halkyñ çeper gelin gyzlary.
Seniñ halkyñ goly bize uzady,
Bile baýram edýäs bahar-ýazlary.
Durmuş, maksat, ykbalymyz biledir,
Doganlygmyz mizemez bir galadyr.

Dostlukdadyr ýeriñ, gögüñ diregi.
Seni beren rus halkyna minnetdar.
Jandan eziz söýýäs birek-biregi,
Halklarmyzyñ dostlugyna minnetdar.
Eý, ezizim, göz aýla bir ülkäñe...
Şöhrat saña, Şöhrat seniñ halkyña!

1949.

Berdi KERBABAÝEW.