Reklama / satiriki hekaýa

REKLAMA

Soňky ýyllarda bir gowy zat peýda boldy: reklama köpeldi. Oňa gereginçe üns berip başladylar öýdýän. Radio gulagyňy üşert, «Öltürer» diýen ýakymly mukamy «öldüräge-de»: «Hormatly radiodiňleýjiler! Margarin iň oňat ýagdyr. Onuň düzüminde adyny tutan witaminleriň bardyr...» diýip, diktor birgiden peýdaly maslahatlar aýdýar. Hawa-da, margarin ýaly lezzetli önüm üçin mukamy, ýa bolmasa Garagumda zähmet çekýän maldaryň waspyny orta bilinden ýolup, pida etmek bolar-la.
Telewizoryň ekranyna gözüňi çüýjert, gözüň näme görýär, haýsydyr bir zadyň iňňän peýdalydygy, ýa bolmasa barypýatan zyýanlydygy hökman nygtalýandyr. Ine-de kinoteatryň giň zaly. Kinožurnal görkezilip dur. Ekranda galagopluk başlanýar. Goh, gykylyk, ýangyn. Dady-bidatlyk. Demir telpekli bir pyýada on ikinji etaža dyrmaşyp ugraýar. Hallan atyp duran merdiwanam bardyr. ýaňky ýigit tüssäniň içine siňip gider. Sen bolsaň, keçe-keçe oýnaýan ýaly, galpyldap oturansyň. In birdenem ýaky demir telpekli gahryman tomaşaçyny begendirer, eli bäbekli ýaş enäni gujagyna mähir bilen gysyp, on ikinji etaždan düşüp gelýändir. Sen bu wakany köp seriýaly, täsin detektiw bir filmdir öýdersiň. Emma az salymdan ekranda diktor peýda bolar-da: «Adamlar, otluçöpi çagalaryň elýeterli ýerinde goýmaň!» diýer. Bolany şo...
Diktor dogry aýdýar: reklama gowy zat. Eger şol bolmadyk bolsa, meselem, çopan goýny nädip bakmalydygyny nireden bilsin! Ýa bolmasa, sen kelemi, badamjany, pomidory neneňsi edip iýmelidigini nädip biljek?!
Indi gazetleriň tutuş dördünji sahypasyny reklamanyň tutýan günleri gabat gelýär. Redaktor görgüliniň goly käte gazetiň üçünji sahypasyna gaýyp düşýär.
Şeýlelikde reklama gaty gerek zat. Şundan ugur alyp, bizem aşakda bir reklama çap edýäris.