14:12 Söýgi / poema | |
S Ö Ý G I
![]() I. Eý, dünýäniň yşkyn demine jemlän, Bägül lebi deýin jebil ezizim. Dünýä sygmaý duýgyň ýandyryp barýan, Peýkam bolup, maňa degdi, ezizim. Aby-köwser-Zemzem çeşmesi deýin, Garaluw gözleriň, köşek gözleriň, Mekanyň aýt, yzyň yzlap gideýin, Ah, tapamok, ah, tapamok, gözleýip. Güllerdemiň, baglardamyň, ýoldamyň, Derýalarda, däli-däli ummanda. Eý, meniň umydym, kaýda sen, kaýda, Meni goýma bu talaňçy dünýäňde. Maňa nämä gerek, sensiz bu älem. Gijeler tisginip, seni soraýar Saňa örklenipdir indi bu täleý, Dideler tisginip, seni soraýar. Men gara gözleňe gitjek garyla, Men seniň demiňde eräp galaýyn. Äykar meni ak almalaň dagyna, Yşkymy, yhlasym, ömrüm talaýyp. Indi maňa ol gözlerden gitme ýok, Indi maňa ömür tükendi sensiz. Men seniň didäňde, başga pitne ýok, Ol gözleriň nurly göwsünden emdim. Ezizinm, köýdürme, Meni derdiňde, Aç, ýüzüňi, didäňi aç, öpeýin, Ezizim, owadan yşyk berdiň-le, Başarmykam otly derdiň göteruip. Bagyşla meni. II. Dideleriň ýakyp, maňa garadyň, Ezizim, sen neneň beýik yşyk sen. Göz-göz eýleäp bagrym içre ýarasyn, Sewn neneňsi duýgy, neneň kesip sen. Olgözleriň nury müň deri-älem. Ol gözleriň nury müň röwşen-umman. Älemgoşaratly giden dünýäleň, Şol nura, şol nura barysy gurban. Bir damja ber, şol keremli ummandan, Seniň yşkyň meni ýakyp, tütämde. Öüir ýaly, kasam içýän Kurandan, Saňa yşkym, ýanar otly tupanda. Şol didäňummanna gark eýle meni, Eý, keremli ýarym, köşek göz ýarym. Aşygna zar bolan diwana kimin, Yşkym süýräp, huzyryňa barýaryn. Garşyla meni. III. Seniň ýüziň şuglasyn, Öpeýin ýarym, öpeýin. Älem inin dygladyp, Öpeýin, janym, öpeýin. Gül ýapragy deý roýuň, Söýdüm tisgine, tisgine. Boýlaryňa ýetmrz boýum, Çyksam dünýäniň üstüne. Ýapyşdym zülpüň taryna, Köňül islän köňül gördüm. Çümen seň yşkyň zaryna, Ah, ýar, sansyz ömür gördüm. Ýok, olaň söýgüsi, janym, Meniň yşkymyň deňinde. Durmaz parhynda hiç zadyň, Meniň yhlasym, demiňde. Şuglaňy kement gur bona, Şeke sapar gara maňa, Meni yşkyň içre gyna, Salgyn bitmez ýara maňa. Seniň derdiňde öleýin, Sen diýp ýyglaýa-ýyglaýa. Ähli dertleriň öwezin, Sygmaz ýekeje şuglaýa. IY. Eý, daňyň demine tisginen bägül, Eý, mawy köllerden göterlen sona, Eý, otly deminden kerem islänim, Ýanýan ýüregime eliň goýsana. Eý, gökleri parran kesen ýyldyrym, Eý, daglardan güwläp gaýdan boz bulak. Meni otly derdiň bilen öldüriup, Zaryň içre, hasrat içre mynçgyla. Söýginiň derdin ber, ýak meni, janym, Otlary guý, bu çäresiz syna sen. Men başgaça bolmak islemeýpärin, Ýandyr, ýak-da, ýşkyň içre gyna sen. Ah, ezizim, gözleriňe döneýin, Şol gara gözleriň, jenneti demiň, Getir, janym, üljeleriň öpeýin, Hem şonuň süňňünde eräp gideýin. Indi maňa ýakan oduň ykbaldyr, Sen diýp şuglalaňda eräp galaryn. Indi duýýan, ýandyrýanyň, yakýanyň, Ýene otly demiň içre talagyn. Y. Saňa aşyk bolup, ynjalyk tapdym, Ýanar otly aýdymlaryň içinde. Ýandyrdygyň Hakdyr, lowlanym Hakdyr, Besse-besse gam-dertleriň içimde. Maňa öz derdiňden jebir ber, eziz, Beýle derde dözen bolmasyn özge. Eýläp-eýläp parlak husnuňa keniz, Äkit daglaý daglaý, ajalyň öýne. Ýandyr meni, ýandyr meni ýak meni, Meni indi ol tamylaňa sygmaýan. Meni ýakan otlar naçar ekeni, Sakar dowzahlaryň ini dyglaýa. Meni berip yşkyň dowzahlaryna, Doňdum men owadan zaryňa batyp. Galdyraý hesretiň dowaklarynda, Gussalaň peýkamy janymabatyp. Mähir doly dideleňde dik meni, Eý-aman, sen meni neýlediň, ýarym. Ygtyýar ýok, perman ýokdur çykmaga, Men seniň mähriňden köýüp ölýärin, Ýandyr meni, ýandyr meni, ýak meni. YI. Sen meni gördüňmi, eý, beýik, Älem, Sen meniň derdime doga berdiňmi. Seniň köňlüň-ýüz segsen müň öwlüýäleň, Boýnuma taşlaýyp otly kemendiň. Galdyrdyň dertleriň, gussa-hasratyň. Garaňky düýbünde, çuňluklarynda. Bilýän, seniň yşkyň meniň kysmatyň. Belki, bagtym meniň Suruň zaňynda. Älemi dolduran owadanşöhläň, Bu dünýäde sowal bilup galypdyr. Seniň demiň degen dag, umman, sähraň, Dowam içre dowam bolup galypdyr. Men olardan soragladym didaryň, Olar galaý-aglaý sorady menden. Men seni nireden, kandan idäýin, Meni otly ummanlarda eriden, YII. Günüň güneşiniň tylla gaýmagy, Aýyt, meniň mähribanym nirede. Zemin şamçyragy, arşyň aýnasy, Aýyt, meniň mähribanym nirede. Didesinde eräp älem didary, Gündizi aglady öpüp gijäni, Yşkymyň jenneti, jany, heýjany, Aýyt, meniň köňül zaryn nirede. Şuglasynda dokuz pelek lowlaýan, Arşyny aglada kürsün oýnaýan, Älen-jahan didaryndan doýmaýan, Aýdyň, meniň ahy-zarym nirede. Daglaň depesinde daglar döreden, Didaryny görgeç dünýe eredi, Dünýä geçer, ol galjakdyr ebedi, Aýyt, meniň dünýe barym nirede. Haçan görer ýanar otly didämi, Haçan maňa wysal eýlär didary, Yşkynda ýanyp men, isläp bimany, Aýdyň, meniň din-imanym nirede. YIII. Gün şuglasy parran geçdi serimden, Günüň şuglasyndan seni gözledim. Säheriň çygyndan, ýazlaň deminden, Esrek umytlardam, mawy dňizden, Resul ummatyndan seni gözledim. Eý, ezizim, mähribanym, dilberim, Maňa ykbal- sen diýp ýanan günlerim, Seniň otly umydyňda gülledim, Gülleriň ysyndan seni gözledim. Şuglaly ýyldyzlar süýnüp sönende, Ýana-ýasna kül bolanda Semender, Sähewrler oýnanda hüýrler-erenler, Beşer dünýäsinden seni gözledim. Men seniň diwanaň, Mejnun derdinde, Sen durmusyň ykraryňda, pendiňde, Bolup gaýtdym la mekanda- kendiňde, Arşyň kyblasyndan seni gözledim. XI. Seniň otly zaryňda, Ýanaýyn, janym, ýanaýyn. Umytlaň dumanynda, Ýanaýy, zarym, ýanaýyn. Dök üstümden dowzahy, Dowzah menden dat eýlär. Ötlar aglar howlaýyp, Dowzahy azat eýlär. Seniň yşkyň zarynda, Dowzah näme, ot näme. Älem meniň ganymda, Jennet sygmyş didäme. Içim ot, daşym nagma, Dilim söýmüş-sylara, Men äleme sygamok, Älem sygmyş synama. Dowzah düşmüş demime, Demim ýakmyş dünýämi. Ahym ýetmiş deňiňe, Dünüä içdi günämi. Seniň otly zaryňda, Kükreý-kükreý ýanaýyn, Soň ezizim alnyňda, Asgyryp , oýanaýyn. Derdiňe dolanaýyn. X. Sen ýanyma geldiň! Ýylgyryp bakdyň! On sekiz müň älem, ýaza çümüpdir. Ähli ölümleriň getidi bagty- Baky dirilige- saza çümüpgir. Seniň älem sygýan otly dideleň, Hallaryňa batan ýüpe3k gijeleň, Gat-gat älemleriň keremi bilen, Ýaňagyňda ýüpek hala çümüpdir. Tisgindim demiňe gark bola-bola, Husny jemalyň aňk bola-bola, Sen gollaryň dolanyňda boýnuma, Däli köňül ham-hyýala çümüpdir. Älem güneşinden şugla geýenim, Zarlap, ýana seň yşkyňda köýenim, Ölümlerden, gapyllykdan öýanyp, Yşky lowlan näzli ýara çümüpdir. Hiç kim çekmez meniň çeken dagymy, Hiç kim çekmez meniň çeken zarymy, Aglaý-aglaý dile aldym adyňy, Ýüregim müň ýyllyk nala çümüpdir. Diýdim:“Ýarym, dideleňden öpenim“. Saýladym men ýowuz ýoluň kötelin, Soňra alyp gitdiň, meni göterip, Arýy aglaýalar zara çümüpdir. Men diýdim: “Ah, kulhuwalla, Ahat, Älkem aýtdy: “EÝ, ýar, Allahy, samat". Lem ýelet, lem ýuwlat, ýekully Ahat!“ Gördüm, iki dünýäm nura çümüpdir. 20-25-nji sentýabr 2003 ýyl. Baýramaly şäheri. Öwezdurdy NEPESOW. | |
|
√ Kyssa -3: poemanyň dowamy - 20.06.2024 |
√ Jeñnama / poema - 03.08.2024 |
√ Jüneýit han / poema - 03.06.2024 |
√ "Aşyk-Magşuk" / dessanyň dowamy - 03.03.2024 |
√ Kyssa / poema - 12.06.2024 |
√ Kyssa -2: poemanyñ dowamy - 14.06.2024 |
√ Esger guýusy / poema - 19.08.2024 |
√ Aşyk Aýdyñ / poema - 22.06.2024 |
√ Kyssa -4: poemanyň soňy - 22.06.2024 |
√ Jeñnama / poemanyñ dowamy - 05.08.2024 |
Teswirleriň ählisi: 0 | |