Araba

ARABA

Tigirlemmi saklap duran okum bar,
Nowadyr arşymdan biraz görk aldym.
Kämahal bedewe,
Käte eşege -
Tirkeldim men, parhyn bilmän tirkeldim.

Ýüz sowmadym, ýygyrmadym seňrigmi,
Näme buýrsaň, hyzmatyňy bitirdim.
Gatatdym ýigitdir çuwal gyzlary,
Çagalary enelerne ýetirdim.

Aýlandym obanyň ýolsuz ýerinem,
Goýmadym köprüsin,
Atyz-pelini.
Käte "keýpim galyp" äkelip berdim
Jahyl ýigitlere maýa gelini.

Garaz, men ýykmadym seniň sözüňi,
Gurbum çatan zatlaň baryn getirdim.
Tigirlene,
Tigirlene ahyryn
Eýäm, seni maşynlara ýetirdim.

Arman şonda ýitirdim men gadyrmy,
Kerm-kem maňa öwürdiň sen ýeňsäni.
Maşyn görüp öz ömürlik hemraňy
Harlamagyň, aýt, eýýäm geň dälmi?

Gynanamok has ökdäni tapanňa,
Hasam güýçlä duşarsyň sen ýöreseň.
Ýöne eýýäm hasam beýik bolardyň,
Aýazhan dek çarygyňa garasaň.

Bilýän, geçip gitdi meniň zamanam,
Öz günüň talabyn öde, hakla sen.
Emma näletlemän meni - geçmişi
Iň bolmanda, muzeýde bir sakla sen.

Amannazar AŞYROW.

"Edebiýat we sungat" gazeti, 1971 ý.