NATAŞA
Solup barýar, solup barýar, gök kürteli tomus çagy,
Aýdyñ günler açyp barýar, açyp barýar arany gyz.
Gijäni-de gurşap alýar dura-dura ümür çygy,
Ümür indi şepagatsyz garañkynyñ ýarany, gyz.
Soldy gitdi meýdanlaryñ gyzyl-ala lälesi-de,
Okgunlyja çaýlaryñ-da buza döndi indi suwy.
Aksowulda döndi gitdi asmanyñ gök halysy-da,
Buýra-buýra agaç başy çalarypdyr eýýäm gowy.
Görer gözüm, göz görejim, niredesiñ sen, Nataşa?
Görünmeýäñ, göremok, ýok, didaryña zor bolum men.
Ýa-da seniñ ýürejigiñ döndümikä indi daşa?
Birje gezek görüşmäge wagtyñ ýokmy, har boldum men?
Ne öñki dek, tolkun atýan mawy kölüñ kenarynda,
Ne-de hoşboý ysly lipa aşagynda görüp bilýän.
Ne ir bilen, söwer dostum, ne-de agşam jybarynda,
Duşup saña, ýüregimi ýüregiñe berip bilýän.
Ýetip gelýär, ýetip gelýär, ýetip gelýär aýazly gyş,
Hä diýmän, ol tokaýlara, çeşmelere bolar myhman.
Tüsselije külbäñizden ot görüner ㅡ ýakymly gaş
Görüner ol aýnañyzdan, çagyrar ol meni hökman.
Gözel gyzyñ didaryny görebilmän arman, ýene
Tora düşen torgaý kimin dyrnajaklap kapasany,
Öz öýümde ýeke özüm gözläp derde derman ýene,
Ýanaryn men, köýerin men ýada salyp Nataşany.
Terjime eden: Ata ATAJANOW.
