Nesip etsin!

NESIP ETSIN!

– Şu gün täze köýnek aldym.
– Toýda geýmek nesip etsin!
– Irden elin gaýmak aldym.
– Bile iýmek nesip etsin!

– Maşyn aldym täp-täzeje,
– Sürmek ony nesip etsin!
– Baryp gaýtjak obamyza ,
– Oba barmak nesip etsin!

– Uzak ilden gardaş geldi,
– Didarlaşmak nesip etsin!
– Dost ýatyr hassahanada.
– Halyn sormak nesip etsin!

– Sähetli gün toýumyz bar.
– Toý toýlamak nesip etsin!
– Suwa düşjek derýa baryp,
– Suw boýlamak nesip etsin!

– O goňşymyň bergisi bar.
– Bergi hasap-hesip etsin.
Algydarlar, bergidarlar
Almak, bermek nesip etsin!

– Palaw geldi, alyň, alyň.
– Bile iýmek nesip etsin!
Nesip etsin, nesip etsin,
«Nesip!» diýmek nesip etsin!

28.12.2013.