Rubagylar

RUBAGYLAR

Taňrysyny tanamasa ol kişi,
Bilginiň, ýol almaz her tutan işi.
Göwün hoşy alahöwren, al-arwah,
Dowzahdyr tomusy, dowzahdyr gyşy.

20.07.2023.

***

Diýerdim men oňa ýigidiň berki,
Indi gözlerinde görýärin gorky.
Munuň üçin oňa “gorkak” diýmerin,
Diýdim: “Gorky-da gerekdir, belki...”

20.07.2023.

***

Häkim bolsaň, taýak atma yzyňa,
Degme namysyna, gelin-gyzyna.
Ataň Gara gaýşak, eneň hem Küti,
Degseň, degjek bardyr öýde uzuňa.

21.07.2023.

***

Ak geýseň-de, bolup bilmeň perişdäm,
Haýry degmez muňa müňläp serişdäň.
Daşy gara, içi akdyr gazanyň,
Ýadymdadyr hokga bilen dürüşdäň.

21.07.2023.

Az bolmandyr heleýguly emir, şa,
Mysaly kän munuň – Süleýman, Mişa...
Gepe gidip ýykypdyrlar döwleti,
Şeýle hökümdarlar musallat başa.

25.07.2023.

***

At eşek ýüküni göterebilmez,
Şagal towuk görse oturybilmez.
“Bilmezler” kän, haýsy birin sanaýyn?
Ýük ýükleseň, pyşdyl getiribilmez.

25.07.2023.

***

Gaplaň, ýolbars, syrtlan... bary ýyrtyjy,
Duşsaň, läşiň gara gana sürtüji.
Ýöne weli adam atly bir mahluk,
Agzyna nan diýip, iýýär gyrtyjy.

25.07.2023.

***

Barlygy çyn bolsa Hudaýyň arşda,
Neçün ýere göndermeýär perişde.
Edeni öňünden geçip ýör mollaň,
Kim ymam, kim sopy... bary dürüşde.

25.07.2023.

***

Iki dostuň arasynda gep bolup,
Göwün içre göwünlerde jet bolup,
Gaýyryp ýör hapa işi ol gende,
Ata-baba haýyr bilen çep bolup.

25.07.2023.