Saña

SAŇA

Zülpüň her bir, taryna ýüz-müň tümen isteseň,
Nagt bereýin pullaryň bir-birden sana zülpüň.
Mämmetweli Kemine

Ugur nirä, gözel görklim,
Rowan bolsun ýollar saňa.
Menzil aşyp ýedi yklym,
Garşy öwsýär ýeller saňa.

Oýanyp sen, säher-daňdan,
Nesibine bagtly bendäň,
Aňkaryşyn gör, jemendäň,
Agzyn açýar iller saňa.

Göz güldürip, gaşyn geren,
«Ýene seni görsem» diýen,
Hoşamaýly sözi örän,
Şirin-şeker diller saňa.

Göz görse, ýürek bökendir,
Yşgyn-mejalym sökendir,
Tamadan göwnüm çökendir,
Garaşdyrdy ýyllar saňa.

Gel, ysgaýyn gara saçyň,
Şirin janym seniň üçin,
Aňla sözüm ýalanmy-çyn,
Şaýat bolar güller saňa.

Illi sözlär, arman-arman,
Gülüp gelseň, gaşyň burman,
Durup bilmen, dilim ýarman,
Malym-mülküm, pullar sana.