Aýperi

AÝPERI

Diňleseň, diýsem sözüm, süýji dilim, Aýperi,
Ýylgyryp bäri baksaň, gyzyl gülüm, Aýperi,
Orta boýly owadan, inçe billim, Aýperi,
Gije dolan Aýym sen, gündiz Günüm, Aýperi,
Taryp edip waspyňy, ýazýar elim, Aýperi.

Sensiz geçen her günüm meň üçin aýa döndi,
Elmydam pikir edip, bu bagrym gana döndi,
Wepasyz ýalan dünýä, maňa zyndana döndi,
Ýüregim howul alyp, bir çykjak jana döndi,
Gül ysly gujagyňy göwnüm küýsär, Aýperi.

Al-ýaşyldan bezenip, golaý gelseň bir görnüm,
Otursam, turup dursam, oýlap bilmen men ornum,
Ap-ak gujaňda ýatyp, ysyňdan gansa burnum,
Gül ýüzüňi bir görse, asla ýygnanmaz ernim,
Eger ýüzüň görmesem, ýürek gysar, Aýperi.

Sallanyp seýkin bassaň, ýörişiň gaza meňzär,
Ýylgyryp göz güldürseň, gülüşiň saza meňzär,
Göwsüňdäki goşa nar pasylda güýze meňzär,
Bägül ysly gujagyň ýene-de ýaza meňzär,
Diňe ap-ak alkymyň gara meňzär, Aýperi.

Syratyňy men synlap, gaşyň meňzetsem ýaýa,
Güler ýüzüň görmegi meňzär on dördi Aýa,
Gün dek şöhle salarsyň, sallanyp girseň jaýa,
Şol boluşda seretseň, aşygyň men gedaýa,
Bütin süňňüm sandyrap, ysgyn gaçar, Aýperi.

Aýperi, adyň tutsam, guwanar dilim meniň,
Aýda bir, annada bir, ýadyňa düşsem seniň,
Sen hakda pikir edip, bilmen geçenin günüň,
Haýhat daňyn atyrmak, on dört sagat gijäniň,
Şu setiri okaňda, gülkiň tutar, Aýperi.

Muhannesi oýlanyp, oýlap düzen Aýperi,
Ýaşlygyňda yzyňa düşüp gezen Aýperi,
Galam alyp goluna salam ýazan Aýperi,
Aýralygyň oduna zordan dözen Aýperi,
Şol aşygyň Sapardyr ýada salsaň, Aýperi.