Dogalanan / nowella

DOGALANAN

- Narine!
Diýip, “Adyňyz näme?” diýen sowala jogap berdi.
Enaýyja sesi, egni resmi lybasly oturan ýigdiň gulagyna, ylla bir jadyly jaňjagaz jyňňyrdan ýaly bolup eşidildi.
Soňam, mazaly müçeneklenip inçeldilen galam gaşlarynyň astynda okara kimin lowurdap duran gözlerini uçganaklatdy-da, kindiwanja, akja dişlerini görkezip, birgeňsi ýylgyryp goýberdi.
Şu ýylgyryşam ýigdiň ýüreginden ok bolup geçdi.
Bar zady unutdy.
Toýuna ýene-de sanlyja gün galanynam, bu ajaýyp jenan neneň-niçik nepis-näzik bolsa-da, ony öz ata-enesiniň ölse-de kabul etmejeginem...
Hemme zat huşundan uçdy.
Diňe özüne bakyp, gülümsiräp duran şu gözel...
Onuň öňünde-de dili tutulyp, gultunyp-ýuwdunyp, kürsüsine ýelmeşene dönüp oturan özi...
Aňynda-da...
Jyňňyr-jyňňyr...
Jyňňyr-jyňňyr...
Jyňňyr-jyňňyr...
Gelin kürtesiniň gotazjyklary şyňňyrdaýana çalymdaş, ýakymly owazjyk şol gaýtalanyp dur, gaýtalanyp dur...
Narine...
Narine...
Narine...
Birsellem şeýdip, doňňara-daş bolup oturandan soňam, diňe gyzyň dodaklarynyň gymyldysyndan onuň özüne nämedir bir zat diýýändigini aňşyryp, çuslandy. Gepe goşuldy-da, Narineň näme üçin gelendigini anyklady. Ilgeziklik bilen onuň möhümini bitirmäge girişdi. Sähel wagtda-da üýni alyşdy ötägitdi.
Dagy, nä?!
Ýigid-ä ýaş, ulagly, aýfonly, gymmat eginbaşly, kärli, barly...
Gyzam görmegeý, alçak, ýeňil, lak atmagam, gepleşmegem aňsat...
“Iş müşgil olmas, asan aňlaýyra duş olsaň” diýleni.
Ýeri, tötänden sataşan iki juwana, dessine sulhy alyşmak üçin şondan özge näme gerekmiş?
Gürleşdiler.
Gülüşdiler.
Wadalaşdylar.
Şol gün agşam duşuşdylar.
Duşuşyk kafe ýazdy.
Kafe bolsa, tanyş-bilişlere jaň edilip, gyssagara tapylan ýeke gijelik kireýine alnan öýe.
Öýem olary mähir-muhabbetdir, hyjuw sallançagyna çalym edip, olary huwwalap garşylady...
Özem şol näzenin bilen möwç alnan ýalynly gijeleriň hemmesinde-de ol anyk duýýardam, bilýärdem – bu gijeler, bu gujaklar, muň üçin-ä ykbal, oň üçinem güýmenje.
Şoň şeýledigine-de bu-la beletdi, olam razydy...

*****
...Yz ýanam öýlendi.
Toý. Gelnalyjy. Nika. Restoran. Aýdym-saz. Tans. “Guşak çözdürdi”. Ikiçäk...
Hiç zat...
Jahyllykda, özgeler öýlenende täze gelen gelniň deňesinden tötänlikde ötäýse, gyrmyzy kürtedenmi, gelniň özündenmi kükeýän täsin, ýakymly, heýjanelek ys burnuna uranyndan başy aýlanyp giderdi. Şonda-da onuň testesterondan dyňzap duran, heniz doly özgerip tamamlamadyk, tagaşyksyz bedenini şeýlebir tükeniksiz hem süýji yzaly sabyrsyzlyk gaplap alardy welin, ol hiç kese bildirmän dişini gysmakdan ýaňa, dişlerini owradaýjak bolardy.
Bu pursat bolsa, öz nikalysy bilen bir otagda ikiçäk oturyşyna, onuň kalbynda hiç zat ýokdy. Duýgam, hyjuwam, mähirem, sabyrsyzlygam...
Sowuk biperwaýlyk. Onsoňam: “Bahymrak bir ýatsam...” diýen pikir.
Özüne ýeňňeleridir has tejribeliräk joralarynyň öwredişi ýaly, başyndan kürtesini äri bolan kişiniň aýraryna ýa-da hökümlilik bilen: “Aýyr-da, nä otyrsyň?” diýip emr eýlärine garaşyp, kürtäniň yşyndan jyklap oturan gelnine tarap bolsa seredesem gelmeýär.
Has takygy, oňa garşy gözüniň gyýtagyny aýladygy göz öňünde garagözelek Narine janlanýar. Çola öýde onuň bilen çolaşyp-çyrmaşyp, birek-birekden doýup bilmän, ganyp bilmän dalaşyp geçirilen howurly gijeler ýadyna düşýär. Hatda, aldym-berdimli yşky garpyşykdan soň, olaryň derinden ýaňa çygjaran düşekde, halys arandygy zerarly çalam-çaş bolup, mejalsyz ýatan näzeniniň beýhuş ediji ysam burnuna uran ýaly bolýar...
Kellesinde-de...
Jyňňyr-jyňňyr...
Jyňňyr-jyňňyr...
Jyňňyr-jyňňyr...
Gelin kürtesiniň gotazjyklary şyňňyrdaýana çalymdaş, ýakymly owazjyk şol gaýtalanyp dur, gaýtalanyp dur...
Narine...
Narine...
Narine...
Hany ol, nirede?
Ol bolsa...
Ine, şuň bilen...
Top-top matadyr, jaňňyr-juňňura çolanan, nätanyş, ýat, keseki, sepinibilenini sepinen atyryndan ýaňa, hatda tebigy gyz ysam bildirmeýän gurjagyň ýanynda...
Eý Allam!
Indi, galan ömrünem Narine bilen däl-de, şuň bilen, şeýdip ötürmelimi?!
Bu otaga deň-duş dost-ýarlary “hangöter” edip, göterip, getirip gidenleri bäri, agzyna suw alan dek dymyp oturan ýigit, umytsyz lapykeçlik bilen sowuklaç oýlandy-da, şol oturan ýerinden, sähelçe çete çekilip, diwara ýakyn oklanan ýassyklaryň birine el uzatdy. Tükge düşüp süýndi.
Bolup geçýän zatlara düşünmän, äm-säm bolan gelin, nämedir bir zat diýmek üçinmi ýa-da özüne ünsi çekmek üçin gozganjyranda-da, ol ýassyga ýüzüni berip ýatyşyna boguksy hüňürdedi:
-Maňa azar berme-de, ýat! Ajygýan bolsaň, hanha saçak ýazylgy...

*****
Ertesi gün galagopluk bilen başlady.
Ir bilen ol otagdan çykyp gidensoň, içerik giren gelnejesi, ilki bilen, hatda düşegiňem ýazylmandygyny gördi. Öten agşam onuň üstüne örtülmeli, juw-ak, tämiz, täzeje örtümem, goýlan ýerinde, epinem açylman ýatyr.
Ýüzi üýtgäp giden ýigit ýeňňesi, elini agzyna ýetirip, daşyna çykarman “hiýh” edip, içini çekdi-de, bada-bat mojuk bir zady çaklady. Emma, ýüzünden-gözünden gar ýagýan, sus gelin bilen hyşy-wyşy edip, iki agyz üm alyşan badyna, ähli zadyň änigine-şänigine ýetdim hasaplap, gaýynenesiniň ýanyna ýüwürdi. Barşyna-da pyşyrdap habaryny aýtmaga howlukdy:
-Enesi, ogluň-a, ýa begennik bolupdyr, ýa-da dogalanypdymmy nämemi, gelniň kürtesinem syrman, düňderilişine ýatyp galypdyr...
-Hiýh! Daş edewersin! Toba estagpyrylla! Tüf-tüf-tüf! Eýle dä bolaýmasyn?!-diýip ýigdiň ejesi, ör-gökden geldi.
-Şeýle şo. Gözüm bilen görüp gelýän. Düşegem atmannyrlar. Onnoňam, muň nähili-neneň bolýanny men bilmän kim bilsin, gyz?! Ulyň-a getirilen günüm meni, edil ýöne eline büre düşen ýaly edip, myjyrdadyp taşlapdy. Ertesi günem ýyrş-ýyrş edip, ikimiziňem ernimiz ýyrtylaýjak bolýady. Bulaň bolsa ikisem, aşa düşen öküz ýaly ýüzlerini sortduryşyp otyrlar.
-Toba, toba! Öz-özünden allanäme bitip gidýän zatdyr-la welin, äý şü, ulalyp oňalman geçen-ä kakasy ikimiziň görmedigimizi görde galdyrjak-la! Men bejit kakasyna bir ýetireýin. Gitsin-de, bir alajyny agtarsyn-da!-diýip ýigdiň ejesi, jibrinjiräp, “hyklap-çoklap” ýerinden turdy...

*****
Başyna şuňa meňzeş iş düşse, türkmeniňem ilki ýapyşýany molla bolýar. Munam, kakasy-ejesi yrza-närzalygyna garaman, agasynyň ulagyna atlandylar-da, goňşy obadaky il arasynda: “demi düşgür” diýilýän mollaňka äkitdiler.
Barsalar, haşamly derwezeli, haýbatly bassyrmaly howluda halaýyk hümer. Her kim nobatyna kaýyl, garaşyp otyr. Bularam tagapyl eýläp garaşmaga oturdylar.
Nobat ýetdi. Kakasy daşarda galdy. Ejesi muny öňüne salyp, molla agaň oturan darajyk otagyna girdi.
Otag siňekden mygylly. Astyna ýumşak körpeçe atynan, takmynan elli ýaşlaryndaky, köseleç sakgally, nagyşsyz ak, ezýaka köýnekli, gyýma balakly, aýagy yssydygyna garamazdan ýüň joraply, tekiz syrylan başy akgaýma tahýaly molla aga:
-Geliň, geçiberiň,-diýip mürehet etdi. Soňra näme dert bilen gelendiklerini soramaga başlady.
Ejesi jogap berýär. Erkine garşy getirilen ýigit bolsa biparhlyk bilen dymyp otyr. Kellesinde-de oýandygy başlaýan:
Jyňňyr-jyňňyr...
Jyňňyr-jyňňyr...
Jyňňyr-jyňňyr...
Gelin kürtesiniň gotazjyklary şyňňyrdaýana çalymdaş, ýakymly owazjyk şol gaýtalanyp dur, gaýtalanyp dur...
Narine...
Narine...
Narine...
Molla aga öz sowallaryna ýigdiň ejesiniň berýän jogaplaryny ünsli diňläp oturyşyna, gabak astyndan onuň biparh keşbini siňňitli synlaýar.
Olaryň arasyndaky gürrüňem, üzlem-saplamragam bolsa, kätebir ýigdiň gulagyna ilip gidýär:
...Nikasy düşmedimikä...
...Dogalanan bolaýmasyn...
...Baglanan bolaýmasyn...
...Jahyllykda-da şuňa meňzeş bir zatlar bolupmydy...
...Gaýrat edäýiň-dä...
...Gül ýalyjak gelniň bagty ýatmawersin...
Olar özaralarynda birsellem sorag-jogap alşanlaryndan soň, ejesi dem salymlyk muňalýar-da, birdenem umytly nazaryny molla aga göterýär:
-Molla aga, okasaň açylarmyka? Ýa muňky dugtorlykmyka?!
Beýle morta soraglary ol öňem kän eşidip gören bolara çemeli, molla garabagyr enäniň sadalyk bilen beren sowalyna birjigem myzaýyk etmeýär. Ýa-da daşyndan bildirmeýär. Äwmän-alňasaman jogap berýär:
-Keýgim, äkidesiň gelse äkit, gözel göwnüň. Ýöne lukmandyr-tebip halkam üýtgeşik bir zady başarýandyr öýtme. Dugtor bilen meň tapawudym diňe, onna diplom ba, mende bolsa ýok. Ýöne, bir zadam unutma. Ine, sen keýgim Nuh pygammer hakda kino bilen, Titanik gämi hakda kinony gördüňmi?-diýip, molla aga wäşilik bilen gözlerini ýyldyrdadýar.
Ýigdiň ejesi, onuň näme diýjek bolýanyna düşünmese-de, erkek göbekli näme diýse tassyklamaga endikli edähetine eýerip, molla agaň aýdýan kinolaryny görenem bolsa, görmedigem bolsa, “hawa” diýen terzde baş atmaga howlugýar.
-Ine, şo kinolary gören bolsaň, onda men, keýgim, saňa bir zat aýdaýyn. Nuhuň gämisin-ä çeper höwesjeň gurdy. Sebäbi Nuh pygammeriň gämi gurmak ugrundan dynnym ýalyjagam diplomynyň bolmanny magat bilýän. „Titanigi“ bolsa ýokary derejeli hünärmenler gurdular. Ýöne, bir-ä dünýäni suw almagyna döz geldi, beýlekisi bolsa birje gezek ummany-da ýüzüp geçip bilmedi. Düşnüklimi?!
Ýigdiň ejesi ýene-de baş atmaga alňasady.
-Indi, seň bilen başlaşaly, inim!-diýip molla aga, göýä bu otagda bolup geçýän hadysalardyr gep-gürrüňler düýbünden özüne dahylsyz ýaly bolup oturan ýigde dikanlady:-Saňa näme bolýa? Woobçe heleý ugruna islegiň ýokmy ýa-da konkretnyý özüňki saňa hoş ýakmyýamy?!
Öňem bärik kakasynyň gazaby bilen getirilen ýigdiň, özi üçin bigäne biri tarapyndan berlen bu soraga girre gahary geldi. “Nä, barlasyň gelýämi? Saňa nä?” diýesi gelip, dili gijäp gitdi. Zordan saklandy. Ilk-ä ejesine, soňam özüne tiňkesini dikip oturan molla aga garşy çaltlyk bilen gözüni alardyp goýberdi-de, “nähili düşünseň düşüniber” diýýän dek, içýakgyçlyk bilen “jukk” etdi.
Köpi gören molla aga, ýigdiň bu biedep hereketine jinnekçe-de tyýkyramady. “Seň ýaly tumşugyna tüýkürip ýören ýarymdälileň günde müň sanysyny görýän” diýýän terzde, egnini gysdy-da molla aga, öňünde duran haşamly, agaç rehildäki kitaby açdy. Birdenem, bir zat ýadyna düşen deý, synçy gözlerini ýigdiň garaçygyna dikdi.
-Inim, görýän welin, sen türkmençilige, okuwa-beýlekä gatybir ynanyp baraňok öýdýän, şeýlemi?
Ýigit içinden: “Howwa” diýip hüňürdese-de, daşyndan ejesinem, özüne sowal berse-de dyrnak ýaly ýamanlyk etmedik mollanam ynjytmazlyk üçin, göwünli-göwünsiz: “jukk” eden boldy.
-Ynanaňok-laý. Görüp durun-a. Ýöne şonda-da, ejeň görgüli ýol-heläk bolup gelipdir, boş gaýtmasyn. “Ynam – dine ýarpy” diýleni. Ynanmaýany okanyň, peýdasy gara şaýy. Müňküre doga täsir etjegem gümana welin, onda-da, belki Allam, ejeň yhlasy ikiň üçinem ýeterlik bolup, okalan doga-dilegleri Eýämiz kabul edäýedi. Okaýyn. Ýöne, okamazdan öňünçäsi, inim, men saňa bir agyz, ýarym agyz bir zat aýdaýyn...
Molla aga, sözüne dyngy berdi-de, gapdalynda duran çaýly käsesinden owurtlady. Soňam öňki äheňinde gyssanman dowam etdi:
-Ine, sen aýt maňa, inim! Beýni näme?!
-Näme?!-diýip, bu täsinden gelen köpbilmiş mollaň nireleri tozadýandygyna düşünmedik ýigit, onuň özüne sorag berdi.
-Ýülük.
-Hawa-aý, dogrudanam, beýnem ýülükdir-äý!
-Sen Kurany-Kerimden bir zatlar bilýäňmi?!
-Mysal üçin, nämäni?!
-Hany ýatla! Keremli Haktagala zenany nämeden ýaradypdy?!
-Adam ataň gapyrgasyndanmy?!
-Bildiň. Indem aýt bakaly, gapyrgada ýülük bamy?!
-Ýo...bilmedim...ýöne ýok bolaýmasa, biz-ä çagakak süňk gemrenimizde gapyrgadan ýülük sorýanymyz ýadyma düşenok.
-Gümansyradyp derde galyp oturma, anyk bilýän, gapyrgada ýülük ýok.
-Onsoň, näme diýjek bolýaňyz-a, agam?!
-Aýal gapyrgadan ýasalan, gapyrgada bolsa ýülük ýok, diýmek heleýde-de beýni!-diýip, hilebir hakykaty açýan ýaly, molla aga ýeserlik bilen gözüni güldürdi:-Beý diýmek bilen aýtjak bolýan zadymam, Ýeriň ýüzünne näçe hatyn bolsa, şolaň hemmesiniňem zanny Adam ataň ýülüksiz gapyrgasyndandyr. Sypaty üýtgese-de, asylky durky-ýasawy üýtgeşik däldir. Şoň üçribem kyrk sany towuk ýumurtgasyny alyp, olaryň her birinem bir reňke boýap, ýekeje özüň kyrk ýerde oturyp iýseňem, ýumurtga şol bir ýumurtgadyr. Şondan özge tagam-da tapmarsyň, kebap ýa-da palaw iýen-de ýaly bolmarsyň. Diýjek bolýanym, Perwerdigär, ol görgülileň haýsyny maňlaýyňa ýazan bolsa, takdyryňa ten berip, oňşuberjek bolaýarlar. O görgülileň şonsuzam şu jahanna derdi-güzaby ýaman ýetikdir-ow, ýaman ýetikdir. Onsoň seň ýaly biri duşsa, oňky artykmaç bolýar duruberýändir...
Şundan soň molla aga ýene-de kitabyna ýapyşdy:
-Ýeri bolýa, men-ä aýtjagymy aýtdym, galanam öz işiň. Innem okaýyn,-diýdi-de, türgen sesini bogazynda gaýnadyp okamaga başlady:-Bissimyllahy ar-rahmany er-rahyýmy...
Söhbetdeşiniň hemme aýdanlary bir gulagyndan girip beýlekisinden çykan ýigit bolsa, aram-aram özüne garşy bakyp “çüfläp” goýberýän mollanyň dogasyny düýbünden diňlemeýärdi. Bu wagt onuň kelleçanagynda şol öňki owaz ýaňlanýardy:
Jyňňyr-jyňňyr...
Jyňňyr-jyňňyr...
Jyňňyr-jyňňyr...
Gelin kürtesiniň gotazjyklary şyňňyrdaýana çalymdaş, ýakymly owazjyk şol gaýtalanyp dur, gaýtalanyp dur...
Narine...
Narine...
Narine...
Hyýalynda-da Narineli howurly gijeler...
Okap bolandan soň, ejesi ogrynça molla agaň aklygyny onuň körpeçesiniň astyna gysdyrdy. Şondan soň, öňem şähdiaçyk bolsa-da, mollaň agaň derçiräp duran maňlaýy hasam birazajyk ýagtylan ýaly boldy.
-Bolýa! Alla ýalkasyn! Allaň özi işiňizi oňuna etsin!-diýip ol, işige ýönelen ýigitdir-ejesiniň yzyndan gepläp oturyşyna, ejesi görgüliň gaýgyly keşbine dözmedimi-nämemi, göwünlik berip galdy:-Gaýrat et, uýam. Adam pahyryň başyny alyp durýan zat ýokdur. Dert beren Biribar, eminem ýany bilen berýändir. Onsoňam, keýgim, aslynda, bu ýalançyň özi lokgalygyna kösenç üçin ýaradylan-da! Her kim bir zatdan kösenip ýör. Kimsäň nany heňli-de çorbasy şurruk, kimsäň bolsa köşki dar-da, göwheri ownuk. Şoň üçinem senem sabyr et…

*****
Molla agaň çaky dogry çykdy. Doga haýyr etmedi. Biraz umytlary kemelenem bolsa, heniz tamasy tala daňylmadyk ata-ene, ýene-de ogullarynyň aňyna-maňyna garaman, ony lukmana görkezermen boldular.
Eltdiler.
Ýene-de nobat.
Ahyry ýetdi.
Eneli-ogul tirkeşip girdiler.
Ýumşak kürsüde, öňündäki kompýuteriň ekranyna örklenip oturan, ak halatly, äýnekli, takmynan otuz bäş ýaşlaryndaky psiholog lukman, edýän işinden ünsüni sowdy. Salamlaşdy. Soňam:
-Görünmäge kim geldi?-diýip sorady.
-Men.
-Onda, gelneje siz daşynda garaşyň. Bärde köpläp almaly zat ýok.
Ejesi çykdy. Ol galdy.
Görkezilen ýere geçip oturdy.
-Näme mesele, inim?
-Äý...neme-dä...-diýip, özüne dykgatly garaýan lukmanyň sowalyndan soň, öňem bihöwes ýigdi hasam tukatlyk basmarlady.
Ýadawdygy ýüzünden bildirip duran lukman gatyrganjak boldy.
-Aýdyber, inim. Bärde ýarawsyzlygyňdan utandysy ýok. Delalat üçin gelen bolsaň, ýagdaýyňy aýtmaly bolar-a. Bizem gurra taşlap, derdiňi biler ýaly palçy däl-ä. Üstesine-de, her ýüz tutan bilen ogar-ogar oýnaşyp oturmaga-da puryja ýok. Däliz garaşyp oturandan doly. Iş wagtymyzam çäkli.
Lukmanyň ýarym igenç gatyşykly bu sözleri ýigdi birneme çuslandyrdy. Ol gümmi-sümmi edibrägem bolsa, iki agyz sözde ýagdaýyny düşündirdi.
-Mbäh...-edip, keşbinde gyzyklanma alamatlary emele gelen lukman, tigirçegini tagyrdadyp, kürsüsini yza tesdirdi:-Inim! Ýokary bilimli bolsaň, düşünýänsiň, erektil disfunksiýa bamy?! Eger şo bolsa, onna sen adresiňi ýalňyşypsyň. Seksapatologyň ýa-da urologyň ýanyna barmaly ekeniň.
Ýigdiň ýüzi boz-ýaz boldy.
-Ýo-how, agam!-diýip ol, ör-gökden gelip, myňňyldamaga howlukdy:-Hemme zat gül ýaly işleýä. Sagat ýaly...
-Beh...-diýip lukman, äýnegini biraz aşak düşürdi-de, süýem barmagy bilen seňrigini owkalady:-Onda, nä beýle bolýa-how, inim?! Bi, seň ýaşyňda dagy, ýerden ýöreýän neme sataşsa neme bolaýjak ýaly welin...
Lukman köpmanyly dymdy-da, ýigde garşy äňetdi. Ýigitden seda çykmady. Onsoň ýene-de lukmanyň özi dillendi:
-Ýa, nä, beýle zada uçramagyň başga bir sebäbi barmy?
-Keşdim çekenok...-diýip ýigit, bu jümläni kynlyk bilen bokurdagyndan iteläp çykardy.
-Hä, näme, endamyndan ýakymsyz ys beýleki dagy gelýämi? Şo şeýle bolsa-ha, onna, eger-de organizminde dogabitdi patologiýa bolmasa, ony-ha dermatologlar bejerýä...
-Ýo...Men-ä şoň woobşe ysam bardyr öýdemok. Ysynam alamok. Ýöne...O meň üçin bir neme ýaly-da...Jansyz gurjak ýaly...
-Weh,-diýip lukman, geň galdy:-Munyň-a ýaman birhili boldy-aý, inim! Bize jynslaryň arasyndaky pynhan gatnaşyklaň psihologiýasyny öwredenlerinde, bälçirän bolup, neme diýerdiler:
“Eger-de hatynyň ysy seni joşdurmaly wagtynda çarpaýa galdyryp kişňetmese, rahatlandyrmaly wagtynda-da öz-özüňden ymyzganyp, uklap galmaga mejbur etmeýän bolsa...
Onda, kösenme!
Barybir syçany pişige çakyşdyryp bilmersiň.
Sen öz almaň ýarysyny heniz tapmansyň.
Agtaryber!”.
A sen bolsa: “woobşe, ysy ýok ýaly” diýýäň... Ýa näme, seň bilen gelniň ikiň psihologiýaňyzam şo “syçan-pişik” diýlen ýaly bir zatmyka?
Ýigit, öz-özi bilen geňeşýäne çalym edip hümürdeýän lukmana jogap bermän egnini gysdy. Az-kem oýurganyp oturan lukman bolsa, birhaýukdan soň ýigdiň derdiniň beýleki tarapyndan baryp görmegi müwessa bildi:
-Ýogsa-da inim, sen öýlenmeziňden öň özge biri bilen halaşyp, indem: “Leýlä meň gözüm bilen serediň!” diýäkge, magşugyna ýetmek üçin çöle çykmakdan gowy çykalga tapmadyk Mežnun deýin, tamdyr gorjalýan kesewä çalymdaş garajürjenje bir zadyň yşgynda dünýeden doýup ýören bolaýma-how, hä?!
Ýigdiň ýüzi çala gyzarjak ýaly etdi. Ol nädip biygtyýar baş atyp, tassyklaýjy “hümm” edeninem duýman galdy.
Lukmanyň aşygy alçy gopdy. Ýüzi ýagtyldy.
-Ýak, senem-ä, inim! “Ysy ýok” diýip, ilde ýok zat tapýaň. Asyl: “Hemme genial zatlar ýönekeýdir” diýlişi ýaly, seňem derdiň köpüň biriniňki eken-ä-how!-diýip ol, keýpihonluk bilen elini owkalady:-Hä, onna, sen öýlenmeziňden öň başga bir gyz bilen gowy görşüpsiň. Soňam häzirki gelniňe öýlendiň. Indem, gelniň saňa ýaranok. Sebäbem, sen öňküňi undup bileňok. Gelniň her bir zadynam öňkiň bilen deňeşdirýäň. Şeýlemi?!
Ýigit ýene-de sesini çykarman baş atdy.
-Aý, inim-ow! Owaly bilen-ä saňa aýtjak zadym, halaşan bolsaň, şonam almaly ekeniň. Indi almadyňmy, “Ody özüňe bas, ötmese kesekä” diýipdirler. Biriniň azap baryny siňdirip, ese-boýa galdyran naçaryny harlama. Bü “söýgi-pöýgi” diýilýän närsä bolsa men saňa ynsanyň beden gurluşynyň biohimiýasynyň nukdaýnazaryndan kesgitleme bereýin.
Biler bolsaň inim, feniletilamil, noradrenalin, dopamin we endorfin – ynsan organizminde söýgüniň emele gelmegini we möwjemegini üpjün edýän dört gormon şü!
Soňra damardaky gana birnemejik testosteron goýbermeli.
Üstüne birje damjajyk prolaktin damdyrýaň.
Oňa-da az-owlak noradrenalin hem-de oksitosin goşýaň.
Ine-de saňa hyjuwyňy däli deňiz deýin tolkun atdyryp duran gormon dürüşdesi taýynjak! Şoňa-da adamlar “söýgi” diýýäler. Düşündiňmi?
Bu taýda, ýeňip-ýeňmez ýaly, gutulyp-gutulmaz ýaly hiç zat ýok. Diňe, özüňi berk eliňe alýaň-da, jogapkärliräk bolmaga çalyşýaň.
Özüňem, ýüzüňi sallama inim! Bilip goý! Seni ýuwdan ýagdaýlarynda-da üç sany çykalgaň bardygyny unutmaly dälsiň.
Olaryň ilkinji ikis-ä maksadalaýyk, soňkusam lezzetli.
Birinjisi, özüňi ýuwdany ögäp-ögäp seni gaýtarar ýaly etmek.
Ikinjisi onuň içiniň züwdürip geçmegini gazanmak arkaly erkinlige çykmak.
Üçünjisi onuň aşgazanynda ereýänçäň galyp, galanja ömrüňi iýenini inine siňdirmän, ýüregini bulap ýaşamak.
Şoň üçinem, guýrugyňam, tumşugyňam, galan zadyňam dik tut! Häzir nepesiňi durlar ýaly iki-üç sany dermanjyk ýazyp bereýin. Şolary atakga, geç, gelniň daşyna. Onnoň hemme zat öz-özündenem düzeler gider...
Keýpi kökelen lukman, ýigde ýarym henekdir ýarym çyn bilen göwünlik berip oturyşyna, kagyz bölejigine çalt-çaltdan nämedir bir zatlary çyrşaşdyrdy-da, ony iş otagyndan çykaryp goýberdi.
Dermanlaň ady ýazylan kagyzjygy gysymynda saklap, ejesi bilen hassahanadan çykyşyna mytdyldap barýarkalaram, ýigit, kellesinde pessaýja ýaňlanmagyny bes etmeýän owaza diň saldy bardy:
Jyňňyr-jyňňyr...
Jyňňyr-jyňňyr...
Jyňňyr-jyňňyr...
Narine...
Narine...
Narine...
Ýürek – kömür...
Köňül – kül...
Näme etmeli?!...