Erkek kişiniñ sözi / ýumoreska

ERKEK KIŞINIÑ SÖZI

Men söýgülime çynlakaý söz berdim:
- Toý edemizsoñ göwnüñ küýsän zady señki bolar!
Ol çaga ýaly begendi:
- Hatda possunam äberermiñ?!
- Gürrüñi näme...
Wagt geçdi. Söýgimiz ýetjek derejesine ýetdi. Biz toý tutduk. Är-aýal bolduk.
Gelnim maña bir wagtky wadamy ýatlatdy:
- Possun alyp berermiñ?!
- Hökman.
Aýy-güni dolup, oglumyz boldy. Ol bir ýaşyna ýetip-ýetmänkä, ýöräp ugrady. Är-aýal begenişdik. Şonda aýalym ýene possunly gürrüñi gozgady:
- Ýyljak possun bolaýsa!..
- Bor.
Ol guş kimin uçaýjak boldy...
Oguljygymyz ýedi ýaşady... Okuwa gitdi. Ilkinji bäşligini güjeñledi. Begendik. Guwandyk. Şonda aýalym uludan dem aldy:
- Sen possunly wadañy unudaýdyñ öýdýän?!
- Ýok-la, ýadymda.
- Ýadyñda bolsa bolýa! - Ol öñküsi ýaly begendi...
Oglumyz orta mekdebi gutaryp, instituta okuwa girdi. Biziñ kalbymyz ýene şatlyk gurşady. Bagtly tolgunşygyñ arasynda keýwanym ýene-de possunly gürrüñi gozgady.
- Ynha, getiräýerin! - diýdim.
Keýwanym ýaşyna bap gelmeýän näzli ýylgyryş bilen gözlerime garady...
Oglumyz instituty gutardy. Saýlap-seçen gözeline öýlendi. Ýyl aşyp-aşmanka-da, ogul agtyjagymyz boldy. Begenjimizden dylym-dylym edişdik. Birdenem, keýwanym ýene köne heñine tutdy:
- Possun?!
- Bor-la, howlukmasana!
Ol uludan dem aldy.
Men şol minudyñ özünde pensiýa pulumy jübime saldym-da, gapdalymyzdaky magazine bardym. Possun satyn alyp, öýe getirdim.
- Görseñ, erkek kişiniñ sözi birdir! "Alaryn" diýdim, aldymam.
Keýwanym kütelşen gözlerini güldürmesine güldürdi, ýöne sesini çykarmady. Possuny aldy-da, agtyjagymyza şüle bişirýän gelnimiziñ ýanyna mytdyldap bardy:
- Gelin jan, gaýyn atañ saña, gör, nähili owadan possun alypdyr. Gutly bolsun!..
Bir elinde agtyjagymyzy, bir elinde-de ýañyja getiren possunymy tutup duran gelnimiz edil çagajyk ýaly begendi.

Allaguly ÝUSUBOW.

"Edebiýat we sungat" gazeti.