Gitseň

GITSEŇ

Gitseň gara daglaň garyna siňip,
Gitseň-düme ýaýlaň ýazyna siňip,
Soňra taşlap bu gussaly şäheri -
Çykyp gitseň özüň özüňe siňip!

Daglaň haýbatyndan keremlik gözläp,
Zawlaň het gatyndan tereňlik gözläp,
Guşlaň ganatyndan belentlik gözläp,
Gitseň gök asmanyň ýüzüne siňip.

Ula ugradylsaň soňuny saýman,
Menziliňe ýetseň gaýnamyň sygman,
Bedewleň gözüne ýaş bolup diňmän,
Gitseň tylla nalyň tozuna siňip.

Humarly gijeleň goýnuna dolup,
Şahyrt şygyr okasa söýüp-söýülip,
Sňz gutarsa... onsoň dowamy bolup -
Gitseň yşk odunyň közüne siňip.

Belentlige aşna göwnüm atygsap,
Dünýäni aýlanyp çykamda sap-sap,
Gitsem-gitsemlere dolanda hasap -
Men gitsem bu dünýäň ýazyna siňip...

* * *

Men parçadan don geýjekdim, synyn silkip, hülleläp,
Harydym talaňa düşmüş, maly dellere gitdi.
Men arçadan öý gurjakdym nakgaş bilen sünneläp,
Köwsarda köz tutaşyplar ýandy, ýellere gitdi.

Dünýäni şeýda bilip men, okadym ança kelam,
Manysyny tiren ýokdur, lal-u-jimlere gitdi.
Garaklarym gark boluban, didelermiň hununa,
Göz ýaşymy sylan ýokdur, agdy, sillere gitdi.

Göwün mukam, göwre naýdyr, söhbetine sadaga,
Sazym serhede sygmaýan, sundy - çöllere gitdi.
Bir agýra duş olmuşam, urdy gapyl badagy,
Oýny dönmüşdi karama, syndy - billere gitdi...

Maral ANNANUROWA.