Ýoldaşlyk degişmesi

ÝOLDAŞLYK DEGIŞMESI

Adyñ Aman, iliñ aman,
Başyñ aman, malyñ aman.
Kompartiýañ saglygynda
Ýöräp barýan ýoluñ aman.

Nirä baksak, nirä çyksak,
Söhbet bile saz görünýär.
Geçi bakan çölleriñde
Ördek bilen gaz görünýär.

Gagşap gezen ýerleriñde
Sowulmajak ýaz görünýär.
Şu zamanda elli ýaş däl,
Iki ýüz hem az görünýär.

Otuz ýyldyr sahnamyzda,
Bäşe taý sen, ona taý sen.
Bir seretsek - Otello sen,
Bir seretsek - Küýki baý sen.

Bir seretsek - Keýmir serdar,
Bir seretsek - Gurban "aga",
Bir gün görsek - Magtymguly,
Ertir görsek - Allan aga...

Biz-ä saña telpek goýduk,
Aman aga, Aman aga.

Kerim GURBANNEPESOW.

"Edebiýat we sungat" gazeti, 27.12.1958 ý.